(یولداشیم جابر فتحی‌نین عزیز خاطیره‌سینه)
آذرده دوغولدون،
آذرده ده اؤلدون.
قاریشدی بیر ملتین طالعینه طالعین.
نه خوشباختسان!
آدین آذرله چکیلیر
اولومون، اؤلومون خاطیره‌لره بوکولور،
یاشاییر
یاشایاجاق دا.
آذرده آلیشدین؛
بیر آنانین گؤزلرینده
یووا قوردو قارانقوشلارین سون اوچوشلاری،
قانادلاریندا پؤهره‌لندی آرزولارین باهاری.
آذرده سؤندون؛
بیر سئزی حسرتین کؤزرتیسینده
هله ده لپه‌لنیر ایشیم- ایشیم ایشیلتی‌لار،
هله ده ایللرین آرخاسیندان سایریشیر
سینه‌سی یارالی اولدوزلار.
نه خوشباختسان!
بو کاروان یورویور هله‌ده کی وار:
گؤزلرینده اومید، آرزی
دوغما آذرینه تامارزی.
۱۷ آذر ۱۴۰۱
