بو تورپاق
سوت دادی وئریر.
بو تورپاغدا
میشیل- میشل لای‌لالار گؤیه‌ریر.
بو تورپاق
قیزیل آلمالارین سئویشن یئری
بو تورپاغدا باهارلاشیر
اوره‌ک‌لرین کؤرپه- کؤرپه دؤیونتولری.

نئجه سئومه‌ییم بو تورپاغی؟!
اونونلادیر سوت‌امر گونلریم،
اونونلادیر توختاقلیغیم
شیرین یوخولو آنلاریم.
اونونلادیر ایلک محبتیمین سون نغمه‌سی
اونونلادیر عؤمور یازیمین
سئومه‌سی
سئویلمه‌سی.

نئجه سئومه‌ییم بو تورپاغی؟!
هله ده قیزیل چیچکلی‌دیر اته‌یی
هله ده قیزیل آلمالی‌دیر قوجاغی
هله ده سئویر
هله ده یاشادیر-
ساچ- ساققالی آغارمیش بیر اوشاغی.
خرداد ۱۴۰۲- موغان