هله‌ده
رؤیالاریمدا گولوش‌لرین گولله‌نیر
هله‌ده
یوخولاریمدان گولوش سسین اله‌نیر:
سن گولورسن
اوزونتولریم نغمه قوینونا سیغینیر
لال باخیش‌لاریم دیل آچیر، دینیر.
سن گولورسن
کؤرپه‌لرین یوخوسونا
قیزیل گول عطری یاغیر،
سئوگیلی‌لرین پیچیلتیسیندان
حیات شیرینلییی دامیر.
سن گولورسن
گؤزلرینده اولدوزلار چیچک آچیر،
قاپ- قارانلیق بیر ایشیقدا
غریب مزارلارین اوره‌یی آچیلیر.
سن گولورسن
ایتگین گؤیرچین‌لر یووالارینا دؤنور،
مزارسیز مئییت‌لر
تورپاق هاواسینا، آنا لایلاسینا بورونور.
کیمسه‌نین گؤزو آرخادا قالمیر
کیمسه‌نین باخیشی ایسلانمیر.
سن گولورسن
دوداغیندا لپه‌له‌نیر یئددی ایل‌لیک شراب
واراق- واراق اوخونور
سرخوشلوق آدیندا بیر کیتاب.
گول!
گوللنسین گولوش‌لرین،
یوخولاریم سولارا یوزولسون
آلین یازیم یئنی‌دن یازیلسین!
آبان ۱۴۰۲- تهران