آلچا شورباسی / علی اشرف درویشیان – چئویرن: سحر خیاوی

آلچا شورباسی
علی اشرف درویشیان – چئویرن: سحر خیاوی

کوچه‌یه یئتیشرکن، ننه کی حیطده حوض قیراغیندا قاب یویوردو بیزی‌هایلادی:”هله هوله آلمایین‌ها! قارنیز آغرییار. پولونوزا خورما آلین، یوخسا بیر شئی کی دویورا”.
یوخولو و یورغون یولا دوشدوک. گونش تزه اوجا داملارین قیراغینا و چینارلارین باشینا دوشموشدو. سئرچه‌لر‌های‌هارای سالمیشدیلار. اوزاقداکی داملارین اوستوندن پشه‌بندلر گونش آلتیندا ایشیلداییب، گؤزلریمیزی قاماشدیریردیلار. اوچوموز ده اسنه‌ییردیک. یای ایدی، امما هله ده سازاق تزه سو سپیلمیش کوچه‌لردن جانیمی‌اوشودوردی. اوره‌ییم چیرپینیردی. تنبل ایدیم. قاییدیب، ائوده یاتماق ایستیردیم. اللریمی‌زنبه یارالامیشدی.
صاحیبخانامیز شهرین یوخاری باشیندا اؤزونه باشقا بیر ائو تیکیردی. من و اکبر و اصغر اونا ایشله‌ییردیک. تورپاق غربیلله‌ییردیک؛ بنا الینه کرپیج و پالچیق یئتیریردیک؛ داش داشییردیق و زنبه‌یله اوتاقلارین کفین دولدوروردیق. صاحیبخانامیز سؤز وئرمیشدی ائوین ایشی قورتاراندا هره‌میزه بیر دست کت شالوار آلسین.
هر گون ننه ناهاریمیزین پولون وئریر و بیزی یولا سالیردی. بازارچادان کئچنده بامیه سینی‌لرین گؤررکن آیاقلاریمیز سوستالیردی. سینی‌نین بؤیرونده اوتوروب پوللاریمیزین‌هامیسین بامیه یئییردیک و آخشاماجا آج و پولسوز قالیردیق.
ننه درزی‌لیکله ائوین خرجین چیخاردیردی. بالاجا باجیم عذرا دا اونا کؤمک ائدیردی. آتا باغ اجاره ائله‌میشدی. یایلار ایشی ائله بویودو.
عذرا آخشام اوشاقیانا و شیرین دیلی‌له بیزه دئییردی: “ناهار یئیه‌نده، ننه دئییر: آه…آی آللاه کئشگه ایکی قانادیم اولایدی الان اوچایدیم و بو قاتیق-خیاری آپارایدیم بالالاریما. آخ الان او داش تورپاق ایچینده نه یئییرلر؟ اللاه ائله‌مه‌میش ناخوش اولماسینلار”.
ننه بیلمیردی کی بیز همن صوبح تئزدن آزاجیق پولوموزو دا خرجله‌ییریک و آخشاماجا پول چیخارتماغا هر قاپییا ویریریق.
قازانج یوللاریمیزین بیری ده چؤرک خانایا خمیر تشتی آپارماق ایدی. بیر قادین واریدی اؤزو خمیر یاپیردی و آپاریردی چؤرکچی اونا مخصوص چؤرک پیشیرسین. اکبر خمیر تشتین باشینا آلیردی و چؤرکچی‌یه آپاریردی؛ ایکی قیران آلیردی. اصغر ده آتیلمیش کاغیذلاری کوچه‌دن توپلاییب، باققال یوسف عمی‌یه وئریب، ایکی قیران آلیردی.
بیر گون یوسف عمی‌کاغیذلاری واراقلایاندا آراسیندان یئکه بیر تویوق پوخو تاپدی. داها بیزدن کاغیذ آلمادی.
ناهار یورغون و آج اوتوروردیق. آزجا چؤره‌گیمیزله باشیمیزی قاتیردیق. یدالله عمی‌کی فهله‌یدی هر گون ناهارا طالبی آلیردی. بیر گون دؤره‌سینده اوتورمیشدیق. طالبی‌نی سیندیریب آچدی. طالبی قورتلامیشدی. ایچی قارالمیشدی. گولدوک. یدالله عمی‌عصبلندی و دئدی: “گلن دؤنه‌دن داها طالبی آلمارام. نه دن ایچی گؤروکمه‌ین بیر شئی آلیم، هن؟ اوزوم آلارام. سیز ده آز گولون. مگر ایندییه‌جن قورتلامیش طالبی گؤرمه‌میشدینیز؟”
سونرا طالبی‌نی چؤله آتدی و بیز گیزلیجه اونو گؤتوروب یئدیک.
بیرگون ده چوخ آجیدیق. بیر اوغلانجیق بیر پاکات دولو خورمایلا کوچه‌دن کئچیردی. اوغلان گؤزل کت شلوار گئیمیشدی و اوزون ساچی واریدی. خورما بیزیم آج قارنیمیزی تحریک ائله‌دی. اکبره دئدیم: “الیندن خورمانی قاپیب قاچیردا بیلرسن؟”
اکبر آغزینین سویون اوتدو و دئدی:” هه.هه داداش جان.الان”
اکبر قاباغا گئدیب سوروشدو: “آغای اجاق‌زاده نین ائوی‌هارادی”؟
اوغلان اطرافا باخاندا، اکبر خورما پاکاتین قاپیب، قاچیرتدی. اوغلان‌های‌هارایلا ائوه گئتدی. آناسی و نئچه نفر قوهوملاریندان گتیردی. قورخودان اسیردیم. اوغلان منه اوز چئویریب دئدی: “بیر قیرمیزی کؤینک اوغلانیدی. ائله بو ائوده ایشله‌ییردی.‌هارا گئتدی؟”
دئدیم: “بیلمیرم. اصلن اونو تانیمیرام”.
اکبر اوزاقلاردان دیوارین کناریندان باشین اوزادیب باخیردی. من اونو گؤروردوم.
اوغلان آناسی‌لا گئتدی؛ امما اکبر گون باتینجا اوزاقلاردا دورموشدو. بیزیم یانیمیزا گلمه‌یه اوره‌ک ائله‌میردی.
اصغرین کیچیک بیر آغاج صاندیغی واریدی کی اوستا بنا آدینی “بدبختلیک صاندیغی” قویموشدو. نییه کی نئچه تیکه قورو چؤرک صاندیغین ایچینده یدی و همشه ده او صاندیغین اوستونده بیزیم آرامیزدا داوا- دالاش و چیرپیشما اولوردو.
صاندیغی ائودن بویات چؤرکله دولدوروب، ایش یئریمیزه آپاریردیق. بعضن ده اصغر پیسپیستا یا چکیرتگه توتوب بدبختلیک صاندیغینا آتیردی.
آخشام توز تورپاقلی و یورغون ائوه یئتیشیردیک. ایشتاهلا هر نه سوفرادا وار، یئییردیک. اصغرین تیکه بوغازیندان گئتمه میش، خورولتوسی اوجالیردی. ننه اونو اللری اوسته یئرینه آپاریردی و غملی اوخویوردی: “آی بالاجا چؤرک گتیره‌نیم؛ آی تورپاغلی پیشیگیم. قابارلی و چاتلامیش اللرینین قوربانی اولوم بالا!”
آخشام یاتاندا دئییردیم کئشگه هئچ واخت اویانمایام. صوبح یئنه گرک زورلا اویانیب ایشه گئده‌یدیک.
بیر گون ناهار چاغی یاریمچیق دیوارین کناریندا اوتورمیشدیق.‌هاوا بورکویدی. آغزیم تورپاق دادی وئریردی. اکبرین گؤزو قیزارمیشدی، آغریییردی. آهک قیریغی گؤزونه چیرتلامیشدی.
آج و حالسیزیدیق. بنا و فهله‌لر تزه تاوانی دوزلمیش اوتاق دا اوتورمیشدیلار. ناهار یئییردیلر.
گونش گؤیون اورتاسیندایدی. بیر کیشی الینده بیر تیکه بوز روزنامه آراسینا قویموشدو، سورعتله سووشدو.
بیردن قارا چرشابلی بیر قادین گؤردوم. حیطه طرف گلیردی. اوزاقدان منه ایشاره ائله‌دی. یاخینا گئتدیم. ننه‌یدی. پورتومیشدی و اوز گؤزوندن تر آخیری. او قدر یولو پیادا گلمیشدی!! نیگران اولدوم.
ننه چرشابین قیراغا ویردی. اونون آلتیندان باغلی بیر مندیل منه وئریب، دئدی: “بوگون آلچا شورباسی پیشیرمیشدیم. سیزسیز یئیه بیلمه‌دیک. عذرانی ائوده قویدوم. سیزین پایینیزی گتیردیم. ایستیکن یئیین. یاخشی شوربا اولوب. نوش اولسون جانیزا بالالاریم”.
ننه‌نین تانیش اییی ایسته‌ملی شوربا اییی‌له قاریشیب، حالدان حالا چئویردی منی. دئدیم: “ننه‌جان اللرین آغریماسین”.
اکبر و اصغرده خبردار اولدولار، گلدیلر. ننه تورپاغلی اوزلرین اؤپدو و اکبرین قیزارمیش گؤزون گؤررکن، اوزونه سیللی ووردی. یاش گؤزلرینده دالغالاندی و گئتدی.
باغلی دستمالی آچدیق. اوستونده‌کی ایچینده دؤیولمیش ات اولان بشقابی کنارا قویدوق. چورگی ات سویوندا تیلتا ائله‌دیک. اصغر بیر تیکه دؤیولو ات‌دن یئدی. اکبر باشینا بیر قاپاز سالدی. دئدی: “اؤنجه گرک سویون یئیه‌ک. نه دن الی اوزونلوق ائله‌دین؟ مگر بیری اته ال وورموشدی سن ده ویردین؟”
اصغرین گؤزوندن آغزینداکی تیکه‌دن شیشمیش تورپاغلی اوزونه یاش آخدی. اوزولدوم و اکبرین سینه‌سینه یومروق ووردوم. اکبر تپیک‌له شوربا کاساسین حیطین اورتاسینا توللادی. قان گؤزلریمی‌آلدی. داها نه ائده‌جه‌ییمی‌بیلمه‌دیم. الیمی‌دؤیولموش اته سالیب، چنگه‌له‌ییب تورپاغلارا توللادیم. اوچوموز ده آغلادیق. اوستا بنا یدالله عمی‌دن سوروشدو: “نه اولوب بو اوشاقلارا؟ نه دن بو گون ایت پیشیک کیمی‌بوغوشورلار؟”
یدالله عمی‌جاواب وئردی: “نه بیلیم. بلکه دده‌لرینین مئراثی اوستونده ساواشیرلار. بلکه ده بدبختلیک صاندیغین آچیبلار”.
گؤزلریمی‌کؤینه‌گیمین قولویلا سیلیب، غربیلی گؤتوروب، تورپاق جوماسینا طرف گئتدیم….

Check Also

یوخو / نجیب محفوظ – روسجادان چئویرن: خاطره نورگول

یوخو نجیب محفوظ – روسجادان چئویرن: خاطره نورگول بو بویدا توزلو-تورپاقلی حَیَطده جمعی بیرجه پالما ...

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *