قوی هؤرومچک تورو ایله سئحیر توخویان ساحیره‌لرین،
اووسونونا دوشسون یاشیل قانادلاریم
آدیم سیلینسین درگی‌لردن
آدیم سیلینسین هر یئردن
ترسینه اوچورام
«نیچه» دییه‌ن
ایچیمده کی قاپ- قارانلیق اوچوروملارا
بارماقلاریمی جالاقلایاجاغام
جهنمده بیتن شام آغاجلارینین گؤوده‌سینه
دلی قانلی قانادلار بیته‌جک کوره‌ییمده
ترسینه اوچاجاغام
زققوم آغاجی‌نین مئیوه‌سینی یئیه‌نه قدر
او چیلغین فیلوسوف منه «احسن» دییه‌نه قدر
اورادا کسکردن دوشه‌جک اووسونلار
چورویه‌جک سئحیرباز ساحیره‌لرین بارماقلاری
اله‌نه‌جک هؤرومچک تورلاری
جوجره‌جک بارماقلاریم زامان- زامان جهنمین شام آغاجیندا
دینجله‌‌جه‌یم شئیطان قوجاقیندا
یئنه ترسینه اوچاجاغام دلی قانلی قانادلاریملا
اودلو قانادلاریمین آلتیندان حقارتله باخاجاغام،
یئر اوزونده هله ده لئش اوستونده بوغوشان قوزغونلارا
گوله‌جه‌یم آزقین‌لارا
لاپبادان بیر باغیرتی گونبولده‌یه‌جک
جهنمین تن اورتاسیندا،
دووارلارینی تیتره‌ده‌جک:
«سن قالخان ذیروه‌یه ائنن دئییلم»*،-هارای چکه‌جک
هارا چیخسان بئله، تور توخویان هؤرومچک‌سن
یازیق میلچک‌سن…
جهنم ملک‌لری بو سؤزدن شاققاناق چکیب گوله‌جک
آغاراجاق قاپ- قارا دیشلری
چرله‌ده‌جک تانریچالاری گولوش‌لری
هه… او گون شئیطان گوله‌جک
«آللاه اؤله‌جک»!!»
وئجیمه دئییل
قوی آدیم سیلینسین درگی‌لردن
آدیم سیلینسین هر یئردن…
*گیومه‌ده گلن میصراع اولو شاعیریمیز «بختیار واهابزاده‌دن» دیر.
یک پاسخ
شعرلر ده دویغو وار اما معنا یوخدو هیچ اوریه یاتمر