دونیام اوچولدو،گلدی غریب های گلین‌باجی
ای وای دئدیم، بؤیوک باجیم، ای وای گلین‌باجی
خاطیرله‌دیم سوسوز، تپی‌یَن دیل- دوداغینی
زَهر اولدو، ایچمه‌دیم کی شیرین‌چای گلین‌باجی
ائرکن گلیب پاییز نییه سولدوردو باغچامی؟!
گئتمک اوچون تَلَسدی نه دن یای، گلین باجی؟!
سرسَم گئدیر باشیم، آه اینانمیر بو نیسگیلی
دئپرم قوپوب،آچیلدی بؤیوک فای گلین‌باجی
بوندان بئله گولوم بو اوره‌ک اولدو قورخولو
دیکسیندیرر اونو قورو بیر های گلین‌باجی
شعر و ادب باغی ایتیریبدیر دادین- دوزون
یوخدور کی باغمانی سنه همتای، گلین‌باجی
سانجاق قالیب یتیم، گَل سیغاللا باشین- گؤزون
یوخسا اؤزوم چالیم سنه لای- لای، گلین باجی
اولدوزلاریلا گؤی، گئجه‌نی بیرگه آغلاشیب
قول بوینونا سالیب گونشین آی، گلین‌باجی
آرزوم بو ایدی بلکه سنه بیر کیتاب سونوم
افسوس بو مرثیه‌مدی سنه پای، گلین‌باجی