وئراندا کوشولدوردو سویوق کولَک
کئچیردی کوچه‌دن او حزین مَلَک
اوشویور ظاهیرن اوره‌یینده کؤز
چئویردی کبریا درگاهینا اوز
بورونموش کَدَره، یانیقلی آها
هؤنکوروب بیر مکتوب یازدی آللاها:
عفو ائله یاربّیم یورولموشام من
داها قول- قاناددان قیریلمیشام من
عزرائیل آدیندان قورو آد قالیب
باخاسان اینسانلار “عزرائیل” اولوب!!
یوخ ائدیر بیر آندا جانلی وارلیغی
هله فخر ائله‌ییر بو اویغارلیغی!!
من نئجه قَهَری ایچیمده اودام؟!
جنازه اوستونده رقص ائدیر آدام!!
بوغازیم قَهَردن کانسئر باغلاییب
گؤزلریم توتولوب بَس کی آغلاییب
کؤرپه‌لر آچمامیش قینیندا سولور
اوغول نعشی اوسته آنا باش یولور
بالا وای ناله‌سی عرشی تیتره‌دیر؟!
سنین ده اوره‌یین بو سَسدن گئدیر؟!
بیر آندا هئچ اولور مین یاشیل یاشام
ایلاهی مَله‌یم من، مگر داشام؟!
یازیردی سوزوردو گؤزوندن یاشی
بوینونو آغیرلیر آغرییان باشی:
-داها چوخ باش آغری وئرمه‌ییم سنه
استعفاء نامه‌می قبول ائت منه
گئدیرم بیر عؤمور دینجه‌لیب یاتام
بشری، دونیانی باشیمدان آتام
گلمیشم جانا من، او خَلقین او سَن
نئینیرسن یاخشیسین اؤزون بیلَرسن
مکتوبون سونوندا ووردو امضاسین
اوره‌کده توتموشدو بشرین یاسین
نامه‌نی تاپشیریب چاپار مَلَکه
اؤزونو سورودو گؤیلرده تَکه
بولوددان یورغانی چکیب باشینا
چئوریلدی تاریخین غم یادداشینا
مکتوبو اوخودو تانری باغری قان
بویوردو: آه… بشر اَلیندن آمان!!
شیطان وئردی سندن اویارتی منه
وئرمیه‌یدیم گرک قول- قاناد سنه
علاجین اولسایدی الینده اَششی
سؤندورردین گؤیده یانان گونَشی!!
تؤکردین یئره سن اولدوزو، آیی
تانری‌یا چکردین زَهَرلی یایی
بئله کی گئدیرسن آی اجلاف کیشی
تئزلیک‌له چکرسن عَرشه آتَشی
حاق وئردی مَلَه‌یه دئدی: یاخشی یول
مکتوبون آلتینا غَملی، چکدی قول*!!
*قول: امضاء
