او آخشام غریبه بیر آخشام ایدی. کولک دام- باجانی اوچوردوردو. نَم هارادان گلن توز- تورپاق، قزئت قیریغی، نایلون، زیر- زیبیل گؤیده اوچوشوردو. قاپیلار سیلکه‌لنیب، پنجره‌لر تیتره‌ییردی.
دوغولماغینا تکی بیر هفته قالیردی. آیاق قویاجاغی دونیادان هئچ بیر تانیشلیغی یوخ ایدی. اورادا اونو نه حادیثه‌لر گؤزله‌دیینی بیلمیردی. باپ- بالاجا اوره‌یینه هؤوشنه دولموشدو. بو سیجاق، دینج قیرمیزی ائوینی ترک ائتمک ایسته‌میردی. آمما بورادا همیشه‌لیک قالا بیلمه‌دیینی ده یاخشی دوشونوردو.
رَحِمین اَت پنجره‌سینی آرالادی، کیچیک اللرینی گؤزونه توتوب، بارماقلارینین آراسیندان دونیایا باخدی. گؤردویو اییرنج منظره‌لری هئچ خوشلامادی. دونیا اوره‌یی سئودییی کیمی دئییلدی. قیرخ آیاقلار کیچیک دیرناقلاری ایله سینیرلارینی پوزدولار، دریسینین آلتیندا عصبلنمیش سیچانلار چابالادی. وحشتلی گؤزلری گؤردوکلریندن آچیلا قالمیشدی. قورخودان ایلبیز کیمی اؤزونه بوزوشدو. دونیا بوتون اینسانلار اوچون، اؤزللیک‌له اونون کیمی “قیزلار” اوچون تهلوکه‌لی و سئویلمز ایدی. باشی هرَلَندی، گؤزونون اؤنونده قیزیل ساچلی گلینجیک‌لر گولله‌لنیب قانا بَلَشدیلر، دارا چکیلدیلر.
اؤزونه یازیغی گلدی، غملی گؤزلریندن نئچه داملا یاش آخدی، گؤبک باغیسینی اینجه بوینونا ساریییب، عوصیان ائتمیش بیر دئوریمچی کیمی اؤزونو دارا چکدی… رنگی گئت- گئده گؤردویو زَهَرلَنمیش مکتب قیزلاری کیمی قارالیردی، نفسی تنگه دوشوردو.
سون آنلاریندا بیری قولاغینا،”دونیا فایداسیزدیر، هئچ بیر شئی الدن وئرمه‌ییبسن منیم بالام!”،-پیچیلدادی.
پیچیلداسا دا قریبه سسی عکس اولوب رحمین فضاسیندا، اِکو کیمی گونبولده‌دی.
بو قورخونج سَسدن آناسی یوخودان دیک آتیلدی. گؤوده‌سینی سویوق تر باسمیشدی، اوره‌یی بولاندی، هؤللو یورغانی کنارا آتیب آیاق یولونا ساری قاچدی. ایچینده باش وئرن عوصیانچیل دئوریمدن خبری یوخ ایدی!!…
قیزجیغاز سئویردی دونیایا گلسین
شیرین سؤز ائشیدیب، گؤزللیک گؤرسون
بوللوجا، یاشامدا سئویب، سئویلسین
راحات، آیین- شایین عؤمور- گون سورسون
گؤستردی کؤرپه‌یه پیس اوزون حیات
گؤروب، گؤردوگوندن قارالدی باغری
سوزولدو او اَنیک جانینا آغری
آرتیق بو آجی‌یا دؤزه بیلمه‌دی
بو قَدَر ظولماتی چؤزه بیلمه‌دی
دونیانین قاراسی باسدی رویاسین
زَهَرله یوغوردو شیرین خولیاسین
گلمه‌میش، یاشامدان کوسدو قیزجیغاز
بو قارا کولَک تک اَسدی قیزجیغاز
قایغیسیز یاشاما واردیر هَوَسی
قولاق وئر، طوفاندا اینیلدیر سسی
*یازی‌دا گیومه آراسیندا گلن سؤز،آلبرکامودان دیر.
