نه گولونج پایلاشیملارا قییدیم
نه ده آل- وئریشلی لایک‌لارا
گومدوم سنی اوره‌ییمین تن اورتاسینا،
اوره‌ییمده بوساط قوردوم، شام یاندیردیم سنه
یالنیزجا سئوگی تانریسینا دوعا ائتدیم بو عزیز آخشام
بیر ده منی قوناق ائتسین دَرین باخیشلارینا
گلدین یوخوما
قوناق اولدوم یئنه دوپ- دورو گؤزلرینه
یئنه آچیلدی اوزومه سیرلی- سئحیرلی قاپیلار
هه… سان کی یارانیش گونو ایمیش او گون
اوجقاردا قوجا تانری سنین خمیرینی یُوغوروردو
مَلَک‌لر ووقارلی ساوالان داغی‌نین اَتَک‌لریندن تورپاق گتیرمیشدیلر
زیغ دوزَلتمیشدیلر
قوجا تانری لاپ حؤوصله‌لی واختی یارادیردی سنی
گؤزلرینین ماوی‌لیگینی سَمادان آلدی
ایچینده پامبیق بولودلار یاراتدی
کؤکسونده آغ گؤیرچین‌لر اوچورتدو
سونرا ایسه دیلینده شیرین- شیرناق تورکولر یاراتدی
دامارلاریندا چیلغین‌لیق قانی آخیتدی
بارماقلارین بارلاندی
گول- گول تومورجوقلاندی
اوره‌یینه یئتَنده، قوجا تانری شاشیریب قالدی:
-بو نئجه یارانیش‌؟!
-یومروق بویدا اوره‌کده مگر دنیز سیغیشارمی؟!
تانری اولسان یئتر
سیغیشدیردی بیر تَهَر
اوره‌یین سَندن چوخ بؤیوک گَلدی
اودور کی سَن باش- آیاق اوره‌ک اولدون!!
سونرا ایسه اوره‌یی‌نین دنیزینده دَلی سوو بالیقلار اوزدوردو
او بالیقلارین بیری «من» ایدیم
هراسان آییلدیم یوخودان
ائویمیز دنیز اییسی وئریردی
اوره‌ییمده دَلی سوو بالیقلار چیرپینیردی…
«ایلهامیم»، آردیجیل حیکایه‌دیر گؤزلرین
چیلغین باخیشلارینی اسیرگَمه مندن!!