دوقتور حسن ریاضی(ایلدیریم)ین آد گونو
ائلیار پولاد
چئویرن: ائلیار پولاد
ترجمه: ائلیار پولاد
سسلندیرن: ائلیار پولاد

گئجه‌ یاریدان اؤتوب، شهر مورگوله‌ییر. ائیوانا چیخیرام. بو سس‌سیزلیکده ایچیمدن بیر گؤینلتی کئچیر. آی اییلیب، کوچه‌نین سونونداکی بینانین کونجونده دایانیب. بیرآزدان بینانین آرخاسیندا گؤزدن ایته‌جک…
داریخیرام. سیگارتیمی ائیوانین کونجونده یئرلشدیردییم، کولقابی‌دا سؤندورورم. ایچری کئچیب، کتاب رفیمه یاخینلاشیرام. گؤزوم رفین اوجا یئرینده دؤرد جلد رومانا دوشور. بیردن نسه ایچیمده آلیشیب-یانیر. کتابلار گؤزوم اؤنونده یاواش-یاواش یوخا چیخیر. یئرینده تانیش و گولر اوز سیما جانلانیر…
بو ایل چوخ عزیزلریمیزی الدن وئردیک. ایتیردیک دئسم سهو ائتمرم. اونا گؤره کی، انسان الدن گئتمیر، ایتیریلیر. انسان وار بیر دفعه‌لیک گئدیر، انسان دا وار کی، گئدیشیندن سونرا، حیاتین بوتون چالارلاریندا اونون یئری بوش گؤرونور. بلکه ده بوش گؤرونمور، خاطرلانیر، یادا دوشور: «او، اولسایدی بئله ائدردی… بو ایشی بئله گؤرردی…» نه ایسه… بو ایل ایتیردییمیز عزیزلردن بیری، بؤیوک انسان، داهی ادیب و حکیم دوقتور حسن ریاضی(ایلدیریم)-ایدی. کرونا ویروسونا یولوخما سببیندن، تهرانین «شریعتی» خسته‌خاناسیندا حیاتا گؤز یوموب، هامینی کدر ایچینده قویوب گئتدی…
منیم ح. ایلدیریملا تانیشلیغیم، آلتمیشینجی ایللردن باشلادی. او ایللر موغاندا، «حسن»‌له «ائلدار»ین الیازما شعر دفترلری الدن-اله و ائودن- ائوه دولاشیردی. من ده بیر موغانلی اولاراق او الیازمالاری اوخویوب، بعضیلرینی ازبرله‌دیم. بئله‌لیکله حسن اؤز شعرلری ایله منی افسونلاییب، اوزاقدان-اوزاغا منده یاخشی تأثراتلار یاراتدی. آیلار دولاندی، ایللر اؤتدو. هشتادینجی ایللرین اوّللرینده «آذری» درگی‌سی ایله تانیش اولدوم. او درگی‌یه شعر و حکایه گؤندرمکله، حسن‌له ده اونسیتده اولدوم…
۱۳۹۰-نجی ایل آبان آیی‌نین اییرمی اوچونده تهراندا علیرضا نابدل«اوختای»یین خاطره‌سینه حصر اولونموش «آذربایجان مدرن شعر گئجه»سی کئچیریلدی. دوستوم همت شهبازی ایله من ده دعوت آلمیشدیم. من ایلک دفعه بو مراسیمده حسن‌له گؤروشدوم و بو گؤروش باشقا گؤروشلرمیزه باشلانقیج اولدو. هر دفعه تهرانا یولوم دوشنده اونونلا مطلق گؤروشمه‌لی ایدیم. هر دفعه اونون گؤروشونده اولاندا، اونون دوشونجه طرزی، ادبی سیماسی و اجتماعی شخصیتی قارشیسیندا حئیرتیمی گیزله‌ده بیلمیردیم. اونون مصاحیبتیندن دویماز ایدیم. بو گؤروشلرده من اوندان چوخ شئیلر اؤیرندیم. او، دانیشیغی ایلا و داورانیشی ایلا مکمل بیر انسان وارلیغینی اورتایا قویوردو. داهیانه دوشونجه‌لری ایله حیاتین دنیزینده ایتنلره بیر مایاک کیمی ایشیق ساچیردی، یول گؤستریردی. الیندن گله‌نی اسیرگه‌مه‌ییردی، «تکی بیر ایش گؤرولوب، نتیجه‌ وئرسین.» -دئییردی.
سون گؤروشوموزده میرزه ابراهیمووون «گله‌جک گون» رومانی حاخدا دانیشیقیمیز اولدو. اطرافلی دانیشدیق و ابراهیم دارابی‌نین «اشک سبلان» رومانینا کئچدیک. من قولاق آسیردیم و بو داهی انسانین بو قدر بو رومانلار حاخدا سؤیلنتی‌لرینه شاشیردیم. بو آدام دا نئجه قدرتلی حافظه وار ایدی. بوتون روماندا اولان اولایلاری یئرلی-یئرینده سؤیله‌ییردی. منسه بو دانیشیقلارین قورتارماسینی ایستمیردیم. بؤیوک بیلگیلر الده ائدیردیم. منیم «بو رومانلارین آراسیندا تاریخی بیر بوشلوق وار.» جمله‌مله راضیلاشماییب، ابراهیم دارابی‌نین «رود پر خروش» رومانیندان آد آپاردی. من ایلک دفعه ایدی کی، بو رومانین آدینی ائشیدیردیم. دئدیم «هاردان الدن ائتمک اولار؟» دئدی «آخشام چاتدیرارام.» او گئجه‌سی حسین کتابلاری منه یئتیردی. ایندی او دؤرد جلد رومان منه خاطره‌یه چئوریلیب و کتاب رفیمین گؤزه دَه‌ین یئرینده اوتوروب. هر زامان کتاب رفیمین اؤنوندن کئچنده، او سون گؤروش بوتون خیردالیقلاری ایلا گؤزومون اؤنونده جانلانیر و حسن‌سیز دنیانی یاشاماغا مجبور ائدیر…
یئنه ائیواندایام. شرقده دان یئریری آغاریر. هارداسا، اوزاقدان بیر اوغولتو گلیر. ایچری کئچیرم. بیلمه‌دن داها آرتیق حبیب فرشباف‌دان ائشیتدیگیم بیر خالق بایاتیسینی دوداق‌آلتی زومزومه ائدیرم:
بوردان بیر آتلی کئچدی
آتین اویناتدی کئچدی
آی کیمی شفق ساچدی
گون کیمی باتدی کئچدی…
یولو داواملی اولسون.

صمد بهرنگی | ترجمه: 
صمد بهرنگی | چئویرن: 
علیرضا ذیحق
چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

دوقتور حسن ریاضی(ایلدیریم)ین آد گونو

بیز گلدی گئدریک سن یاشا دونیا!

ائلیار پولاد
www.ishiq.net

آذربایجان ادبیات و اینجه‌صنعت سایتی

دوقتور حسن ریاضی(ایلدیریم)ین آد گونو

بیز گلدی گئدریک سن یاشا دونیا!

ائلیار پولاد
www.ishiq.net

آذربایجان ادبیات و اینجه‌صنعت سایتی

دوقتور حسن ریاضی(ایلدیریم)ین آد گونو

بیز گلدی گئدریک سن یاشا دونیا!

ائلیار پولاد
www.ishiq.net

آذربایجان ادبیات و اینجه‌صنعت سایتی