آیدین
ائلیار پولاد
تزه‌جه اون بئش یاشینا دولوردو. عادی بیر سویوخ دیمه‌دن سونرا تامام سسی دییشمیشدی. عایله‌سی و دوست تانیشلار “سویوخلاییب، کئچیب گئده‌ر” – دئیه اونا اوره‌ک توختاخلیغی وئریردیلر. آنجاق آیدین اؤزو بو وضیعتی چتینلیکله قبول ائده‌ره‌ک فیکیرلشیردی: نولسون، سسیم بیر آز باتیب، کئچیب گئده‌ر، یئنه اوولکی وضیعته قاییدارام. آمما اونون سسی گوندن- گونه بمله شیردی. آناسی اسمر خانیم چوخ نییاران ایدی. قونشودا کی ائوده تویا حاضیرلاشیردیلار. آیدینین یئنی یئتمه اولماسینا باخمایاراق او بوتون قوهوم و اقره‌بالارین تویونون اوول- آخرینه قده‌ر الیندن گلنی اسیرگمزدی. قوناقلار گلردیلر و او زامانا کیمین کی موسیقی قوروپو گلمه‌میشدی آیدین مجلیسی آپارار و قروپون موغنیسی یورولاندا یئنه آیدین مجلیسه ذووق وئره رمیش…
اسمر خانیم مطبخده بیش – دوشور ائدیردی. ائله بو زامان قاپی دؤیولدو. دؤشلویو چیخاریب وائله الینی‌ده اونلا تمیزله‌دی “کیمدیر – گلدیم ” دئیه حیط قاپیسینا طرف یوللاندی. پیله‌کانی ایکی- بیر ائدیب و قاپینی آچمازدان اوول سوروشدو:
– کیمدیر؟
– قاپینی آچ ، اسمرخانیم منم. – دئیه ، حلمه خالا سسلندی.
اسمر خانیم سسی تانیدی و قاپینی آچاراق حلمه خالانی ایچری دعوت ائله‌دی. ایکی قونشو سالاملاشیب و حیطه گلدیکده قاپینی آرخادا اؤرتدولر. حلمه خالا دئدی:
– باغیشلا اسمر خانیم ایشیندن قویدوم. ائله بالانا قیسمت بو گون ترلانین تویو باشلانیر. سیزی بوتون عایله‌یله بیر یئرده تویا دعوت ائدیرم و دئمه‌لییم کی بو آخشام موسیقی اولمایاجاق. آیدین گلرسه قوناقلارین یانیندا اوزوموز آغ اولار.
اسمر خانیم داخیلی عالمی اوزه گلمه‌سین گولومسه‌یرک جاواب وئردی:
– حلمه خالا تویا حتمن گلریک و چوخ تاسسوفلر اولسون آیدینین سویوخ دیمه اوجوباتیندان سسی توتولوب. اؤزون بیلیرسن کی آیدینین شنلییه چوخ ذووقو وار، اوزوده گله‌جک. آنجاق موغنی اولساییدی چوخ یاخشی اولاردی.
حلمه خالا بو زامان دریندن بیر آه چکیب دئدی:
– اسمر خانیم بیزیم بو آخشام اومیدیمیز آیدینا ایدی. حاییف، من ایندی گئدیم ائوه باهادور آغایا دئییم کی بیر آیری فیکیر ائله سین.
گون باتانا آز قالیردی. قونشو ائوده سس-کوی چوخالیب و قوناقلار بیر- بیر ایکی-اوچ گلیردیلر. باهادور آغا حسن آغایا تاپشیریق وئرمیشدی کی نه تهر اولورسا اولسون بو آخشاما موغنی تاپیب گلسین. حسن آغا باهادور آغانین یاخین دوستو ایدی و بوتون کند اهلی اونا اینانیردی. او بیر ایشی عهده‌سینه آلدیقدا گره‌ک یئرینه یئتیره‌ییدی. اودور کی گوندن بیر آز قالان شهره گئتمیشدی.
قوناغلار گلیردیلر، آمما حسن آغادان خبر یوخیدی. باهادور آغا زامانین اؤتدویونده کدرله‌نیردی و هر قوناغی قارشیلایاندا بو تدبیرسیزلیینه گؤره اؤزون قیناییردی.
حسن آغانین شهرده یاخشی بیر دوستو واریدی و ایشی موشگوله دوشنده اونا اوز توتاردی. اودور کی گون باتار باتماز اؤزونو دوستونا یئتیریب و احوالاتی دانشیب کومک ایسته دی.
بختیار قفه‌چی دئدی :
– هامی تویون ایلین بو واختینا سالیر و بیر هفته اؤنجه بئیله‌شیرلر.
– بختیار دایی سندن سورا هئچ کیمه گومانیم گلمیر.
– یاخشی ایندی کی آخشامدی. اؤزونده گؤرورسن قفه‌خانا بومبوشدور. آخی موغنینی هاردان تاپیم؟
بختیارکیشی بو سؤزلری دئیه-دئیه بیر ایسته‌کان چای حسن آغانین قاباغینا قویدو.
حسن آغا دیرسک‌لرینی ماسانین اوزه‌رینه قویاراق، اووجونا چنه‌سینه سؤوکه‌ییب دئدی:
– بختیاردایی اؤزون بیلیرسن کی باهادور آغایلا من عایله‌وی دوستام و ایندی اونون اوغلو ترلانین تویودور. اگر بو آخشام موغنی تاپماسام، اؤزومو هئچ واخت باغیشلامارام.
بختیارکیشی ایسته‌کانلاری بیر آغ دسماللا قورولاییردی. ائله بو زامان قاپینی آچیب ایچری گیرن آدام اونون گؤزونده قیغیلجیملار پاریلداتدی و اوزونو توتوب حسن آغایا دئدی:
– مندن سنه هارای اولماز گؤروم فخری موعلیم نه دئییر.
بختیارکیشی بو سؤزلری دئیه‌رک آرمودو ایسته‌کاندا خوروز قویروغو بیر چای تؤکوب و فخری موعلیم ایله‌شن ماسایا یاخینلاشیب، چایی ماسانین اوستونه قویوب دئدی:
– خوش گلمیسینیز.
– خوش گونوزه گلک، نئجه سن بختیار دایی؟
– ساغ اول اوغلوم.
فخری موعلیم شهرین بیلیم یوردوندا فلسفه درسی دئییردی و موسیقی‌یه علاقه‌سی اولدوغونا گؤره اؤز ائوینده موسیقی درنه‌یی آچمیشدی. بوتون شهرده اولان گنج موغنی‌لر اوندان موسیقی درسی آلیب و موسیقی عالمینده اؤزلرینی فخری موعلیمه بورجلو ساییردیلار.
فخری موعلیم بختیارکیشینین دایمی موشتریسی ایدی و دوست تانیشلاریلا بو مکاندا گؤروشردی.
بختیارکیشی ماسانین اوستون سلقه‌یه سالاراق، اوتانجاق حالدا دئدی:
– بو منیم دوستوم حسن آغادی. بو آخشام تویلاری وار. آمما هئچ بیر موغنی تاپا بیلمه‌میشیک. بلکه بیزه کؤمک اولاسان؟
فخری موعلیم ایسته کانی بارماقلارینین آراسینا آلاراق جاواب وئردی:
– من چوخ سئوینه‌رم بیرینه کؤمه‌ییم دیسین. آنجاق منیم تانیدیقلاریم عادی طلبه‌لردیلر و ایندیه‌دک مجلیسه چیخمامیشلار. آنجاق نه ائتمک اولار من اؤزوم ده ائله بیر آز کئفسیزم. بیر- ایکیسینی گوتوره‌ک گئده‌ک.
ائله بو زامان بختیارکیشی سئوینجیندن ایره‌لی‌له‌ییب فخری موعلیمی قوجاقلاییب و باغرینا باساراق تشکورونو بیلدیردی. حسن آغادا دیل- آغیز ائدیب، اوچو ده بیر یئرده قفه‌خانادان چیخیب و فخری موعلیمین ماشینیندا اوتوروب طلبه‌لر اولان یئره گئدیلر.
***
فخری موعلیمین ماشینی کنده یئتیشیب و باهادور آغانین قاپی‌سیندا دایاندی .
گونون باتماسیندان چوخ کئچمه‌سه‌ده، باهادور آغا اؤزونو ایتیرمیشدی. قوناغلاریندان شرمنده اولدوغونو گؤروب حیطده یئرسیز اوتای- بوتایا گئدیردی. ائله بو زامان حسن‌آغا قوناغلاری ایجری دعوت ائدیب و باهادور آغانی گؤرستدی:
– تانیش اولون بو باهادورآغا، منیم دوستوم و ترلانین آتاسی.
قوناغلار بیر- بیر یاخینلاشیب، ال وئریب سالاملاشدیلار. حسن آغا سؤزونون آردینی کسمیردی:
– بو فخری موعلیم شهرمیزین ان اعتیبارلی ضیاللیسی، بودا کی منیم دار گونومون اومیدی بختیار دایی و بو بیرسی‌لر گنج طلبه‌دیلر.
باهادورآغا تلسمه‌دن قوناغلاری ایچری دعوت ائده‌رک فیکیرلشیردی: “من حسن آغانی شهره موغنی دالیسینجا گؤندردیم او شهرلی قوناغی گتیریب. ائله کند اهلی بیر تهر منی باغیشلار، آمما من بو قوناغلارلا نئیله‌ییم. آیدینیندا کی سسی باتیب. لاپ بیابیر اولاجاغام.” قوناغلار ایچری کئچدیکدن سونرا حسن آغا باییرا چیخیب ماشیندا اولان چالقی آلت‌لرینی گتیرنده باهادور آغا اونو گؤردو و سئوینجک حالدا دئدی :
– قریبه آدامسان حسن آغا. لاپ اوره ییم یئرینده دایانمیشدی. اولمازدی اوولده منی باشا سالاسان؟
– باهادور آغا ، بو آخشام اؤزه‌ل بیر آخشام اولاجاغ. قوناغلارا مجلیسده یئر وئر.
باهادور آغا قوناغلاری مجلیسین یوخاری باشیندا ایلشدیریب و سونرا حیطه چیخیب، قوللوقچولارا تاپشیریقلار وئردی…
آیدین مجلیسین آشاغیسیندا اوتورموشدو فخری موعلیم صؤحبته باشلادی:
– منیم عزیزلریم بیز هامیمیز بو آخشام بورا گلمیشیک کی ، باهادور آغانین اوغلو ترلانین توی مراسیمین قئید ائده‌ک. منیم اطرافیمدا اولان بو طلبه‌لر هله موسیقی یوللاریندا ایلک آددیملارینی آتیرلار. سیز فهیم جنابلاردان ایسته ییرم کی ، اونلاری آلقیشلاییب و هامیمیز بیر یئرده چالیشاغ کی ، بو مراسیم طنطنه‌لی کئچسین.
مجلیسده اولانلار هامیسی بیر یئرده فخری موعلیمی آلقیشلادیلار. ساغ اول-وار اول سسی اوجالدی. تارچی کؤکو ” سه‌گاها” کؤکله‌ییر و کامانچی اونا زووم توتور. مجلیس یاواش- یاواش موسیقی ترنومیله ساکیت‌لشیردی. موسیقی دونیاسی اینسانی روحلاندیریر و اینسانین اوره‌یین اوخشاییر و ائل- اوبا عادتینده مجلیسلرین یاراشیغیدی. هردن بیر فخری موعلیم شعیر اوخویور و اونون سسینده اولان اوره‌یه یاتیملی آهنگ آیدینی یئرینده دیللندیریردی. نهایت اؤزون ساخلایا بیلمه‌ییب اوتوردوغو یئرده آیاغا قالخیب سوزه باشلادی:
– من بوتون قوناغلارا خوش گلدین دئیه‌رک واختلارینی آلدیغیما گؤره عوذر ایسته‌ییب دئمه‌لییم کی ، ترلان منه بؤیوک قارداش اولاراق منیم بوینومدا حاقی وار. اودور کی منیم سسیمین باتماسینا باخمایاراق بو آخشام اوخوماسام ، اؤزومو باغیشلامارام. اؤنجه هامیدان عوذر دیله‌ییب و اوستادلاردان خاهیش ائدیرم کی، آشاغی پرده ده بیر هاوا چالسینلار و من اؤز بورجومو یئرینه یئتیره بیلیم .
یئنه‌ده مجلیسی آلقیش سسی بورودو. تارچی “سه‌گاه زابول” اوزره چالماقا باشلادی. آیدین وار گوجوییله چالیشیردی کی، بو موغامی آخیراجان اوخوسون. مجلیسده اولانلار هامیسی آیدینین اوخوماسین کئچمیش تویلاردا گؤروب و ائشیتمیشدیلر. بیلیردیلر کی بو سس قاباقکی سس دئییل. آمما فخری موعلیم فیکیرلشیردی :”بو یاشدا بیر گنج نئجه بو موغامین عهده سیندن گلیر ؟ ” تعجوب ائتدیکده اوزون حسن آ غایا توتوب دئدی :
– بو کیم دیر؟
– کندیمیزین بولبولو دور. آمما حاییف سویوخ دیمه‌دن سسی توتولوب.
فخری موعلیم هئچ نه دئمه‌دی. او دوشونوردو کی : “سویوخ دیمه‌دن سس بو قده‌ر کورلانماز”. و آیدینین قابیلییتله اوخودوغو موغاما قولاغ وئرنده دوشوندو کی : “اولا بیلسین اونون حنجره سی خسته‌له‌نیب”. ائله قوناغلار داغیلاندان سونرا آیدینی چاغیریب و سوروشدو:
– اوغلوم نئچه واخدیر سسین باتیب ؟
– ایکی هفته اولار .
– سحر منیمله شهره گئده‌ک. اورادا یاخشی بیر حکیم وار. آپاریم سنه باخسین.
– یوخ زحمتنیزه راضی اولمارام. عادی سویوخ دیمه دی ، کئچیب گئده ر .
– یوخ اصلن زحمتی یوخدور. صاباح موطلق منیمله گئتمه‌لیسن.
***
فخری موعلیم و آیدین حکیمله اوزبه- اوز اوتورموشدولار. حکیم آیدینی معاینه ائدیکدن سونرا اوندان ایسته‌دی کی او بیری اوتاقدا گؤزله‌سین. آیدین گئتدیکدن سونرا اوز توتوب فخری موعلیمه دئدی:
– حاییف الیمدن هئچ نه گلمز. بو اوشاغدا اؤزه‌ل بیر حنجره وارمیش. تاسسوفلر اولسون کی اوندان دوز ایستیفاده اولونماییب. اونا موسیقی و سس یئتیرمه تربیه‌سی وئریلمه‌ییب. اونا گؤره‌ده اونون سس سیستیمی زده‌له‌نیب و تاسسوفله دئمه‌لییم کی ، هئچ واخت اوولکی فورمایا قایتارماق ایمکانی بیزده یوخدور .
حکیم دانیشا- دانیشا موعلیم دوشونوردو :
…….او واختا کیمین کی بیزیم مکتبلرده موسیقی درسلری کئچمیر. اولادلارمیزین بو حالا دوشمه‌سی قریبه اولمایاجاق…
او اینتیظار اوتاغیندا اولارکن فخری معللیمله حکیمین موباحبثه‌لرین ائشیدیردی و دریندن فیکره گئتدیی اوچون فخری معللیم قاپینی آچیب ایچه‌ری گلمه‌سینی دویمادی. آرتیق معللیمین آرخاسینجا حکیم ده ایچه‌ری گلمیشدی. فخری معللیم حکیم له دیل – آغیزدان سونرا آیدینا اوز توتدو:
– هه ، آیدین ، هئچ نه‌یین دئییل. ساده جه سویوخ دیمه دندی ، کئچیب گئده ر.
آیدین فخری معللیم له بیر یئرده مطبدن چیخدیلار. گونش گؤیون اورتاسیندایدی. کوچه ده گل – گئت چوخالمیشدی. ماشینلارین سسی اینسانلارین سسینه قاریشمیشدی. کوچه آلوئرچی‌لری قولاق باتیرجی سسله موشتری‌لرین چاغیریردی. اونلار بیر آز گئتدیکدن سونرا خلوت بیر کوچه‌یه دؤندولر. هر ایکیسی فیکیر- خیال عالمینده سئیر ائدیردیلر. آیدین اوز توتوب فخری معللیمه دئدی :
– معللیم ، من سیزدن چوخ تشککور و مینتدارلیق ائدیرم. سیز بویوک روحه مالیک‌سینیز. آمما مندن اینجیمه‌یین، حکیم له سیزین دانیشیقلارینیزین هامیسینی ائشیتدیم. منی ایجازه سیز قولاق آسدیغیما گؤره باغیشلایین .
فخری معللیم کؤکسون اؤتوروب و دیللندی :
– من ائله بیلیرم کی ، سن هئچ نه ائشیتمه‌میسن. ایندی کی ، ائشیتمیسن ، سندن ایسته ییرم کی ، بوندان بئله اوخوماغین فیکریندن داشیناسان ، چونکی سنه داها زیانی وار.
اونلار سوکوت ایچره آغیر آددیملارلا یئریییردیلر. بیر ایری بولود گونون قارشیسینی آلدی. هاوا بیردن – بیره سویوقلاندی. اونلار یوللارینی بختیار دایی نین قفه‌خاناسینا طرف یؤنلتدیلر. هاوانین بیردن – بیره سویوماسی گلیب – گئدنلرین سورعتینی آرتیردی. هامی مقصدلرینه تئز چاتماق اوچون تله‌سیردی. آرا- بیر یاغیش دامجیلاری اونلارین اوست – باشلارینی دؤیجله‌دی. اونلار قفه‌یه گیرن کیمی شیدیرغی یاغیش باشلادی. بیر بوش ماسایا یاخینلاشیب اورادا ایلشدیلر.
بختیار کیشی در حال اونلارین ماساسینا یاخینلاشان کیمی ماسانی تمیزله ییب و دئدی :
فخری موعللیم یورولمایاسینیز بوگون چوخ زحمت چکمیسینیز. همشه وار اولون. آخشام دا کی سیزه چوخ زحمت وئردیک.
فخری موعللیم جاواب وئردی :
– یوخ بختیار کیشی منده ائله بئکار ایدیم. لاپ یئرینه دوشدو. بو گون ده لاپ بئکار ایدیم. ائله آیدین دا بهانه اولدو.
بختیار کیشی آرتیردی :
– یوخ ائله دئمه همشه زحمتیمیز سنینله دیر.
آیدین هئچ نه دانیشمیردی. اونو فیکیر گؤتورموشدو. ناهار یئمه‌گیندن سونرا فخری موعللیم اوز توتوب آیدینا دئدی:
– هه اوغلوم ، دای واختدیر. ایندی من گره‌ک بیلیم یوردونا گئده‌م. ایستردیم کی ، سنینله اولام ، آمما نئیله مک، واخت گلر بیر – بیریمیزی آرتیق باشا دوشه ریک. ایندی ساغ اول من گئنمه لییم.
فخری موعللیم گئدندن سونرا آیدین لاپ تک قالمیشدی. یئمکخانا گاه دولور گاهدا بوشالیر. آمما بونلارین هئچ بیری آیدینا ماراغلی اولمور. او کنده قاییتمالی دی.
***
نئچه ایللر کئچدی. آیدین اورتا مکتبی بیتیردی. آمما اونون سسی اوولکی یئرینه قاییتمادی. او کئچمیش ایللرده فخری موعللیمله علاقه‌سین کسمه‌دی. اونون کؤمه‌ییله اینجه صنعت فاکولته‌سینه قبول اولدو. دؤرد ایل موسیقی درسینی باشا ووردو. ایندی آرتیق او بیر موسیقی موعللیمی ایدی. آنجاق اؤزو هله اؤزویله باجارمیردی. نسه بیر چاتیشمامازلیق اؤزونده حیسس ائدیردیردی.
۱۹۹۰- نجی ایللریدی. شیمالی آذربایجانین یولو آچیلمیشدی. او تایدان بو تایا – بو تایدان او تایا گلیب گئدیردیلر.
گونلرین بیر گونو یئنه بختیارکیشینین قفه‌سینده اوتوروب فخری موعللیمی گؤزله‌ییردی. اونلار همشه بو یئرده گؤروشردیلر. شهریور آیینین اوول‌لریدی. هاوا چوخ اوره‌یه یاتیم ایدی. ائله فخری موعللیم و آیدین تعطیل گونلری بورادا اولاردیلار. اؤتن گونلر اولدوغو کیمی بو گونده آیدین فخری موعللیمی گؤزله‌ییردی. آمما ندنسه بو گون بیر حیسس، بیر ایستک فخری موعللیمین گلیشینی یوباندیریردی. او حیسس ائدیردی کی ، فخری موعللیم یوبانیر، بلکه ده او حیسس اونو تلسدیریردی. او گؤزونو قاپیدان کسمه‌یره ک آرزولارینا فیکیرلشیردی. رویالارینا دالیب نسه بولودلاردان آرتیق قانادلانیردی. او سوزون نئجه ، نه تهر باشلادیغینا فیکیرلشیردی. ایسته‌یین نئجه فخری موعللیمه دئمه یین آختاریردی. ائله بو آن فخری موعللیم ایچری گیره‌رک ،آیدین اوتوران ماسایا یاخینلاشیب اونونلا اوز به اوز ایلشه‌رک سؤزه باشلادی :
– ده گؤروم نئجه سن ؟ گونلرین نئجه کئچیر ؟
– ساغ اول. پیس دئییلم. سیز نئجه سینیز ؟
– من همه‌شه کی کیمی. آمما سن بو گون بیر تهرسن. یوخ ؟
– ائله دیر. بو گون من بیر سیرا فیکیر لر اورتاسیندایام .
– نئجه به‌یم ؟
– دوزونو دئسم ، منی قینامازسانکی ؟
– یوخ.
– ایستیرم سفره گئدیم.
– نئجه ؟ سفره؟
– دوز ائشیتدین. ائله مملکتدن اوزاغا .
– بیر آز آیدین دانیش. گؤروم نه دئییرسن.
– دوزو بو دور کی ، شیمالی آذربایجانا گئتمک ایسته ییرم.
– نئجه ؟ شیمالی آذربایجان ؟
– بعلی. گئدیرم درسیمی داوام ائده‌م.
– یاخشی من نه ائده بیللم ؟
– سیزین اؤیودلرینیز همشه قولاغیمدادیر. خئییر – دوعانیزی ایسته‌ییرم.
اونلار چوخ دانیشدیلار. نهایت راضیلاشدیلار. نئچه گوندن سونرا ، آیدین سحر تئزدن حاضیرلیقا باشلادی. پاسپورت آلدیقدان سونرا سفره حاضیرلاشیب چانتاسینی باغلادی.
***
تئرمینالدا اونو فخری موعللیم بیرده بختیاردایی یولا سالیردی. اونلار قول بویون اولوب قوجاقلاشدیقدان سونرا آیدین آوتوبوسدا ایله شدی. شوشه‌دن اونلارلا ساغ اوللاشدی. آوتوبوس یولا دوشدو.
تبریز آرخادا قالیردی. او گئت – گئده تبریزدن اوزاقلاشاراق ، تبریزی اؤزویله آپاریردی. نهایت گون گؤیون اورتاسینا چاتدی و اونلار آستارا مرزینه یئتیشدیلر. اورادا بیر سیرا آختاریشدان و گزینتی‌دن سونرا اونلار شیمالی آذربایجانا داخیل اولدولار.
همیشه رویاسیندا گؤردویو کیمی اولدو. شیماللا – جنوبدا هئچ فرق یوخ ایدی. اینسانلار عئینی ، چوخ صمیمی و مولاییم طبیعت ده ائله بیل کی ، بیر – بیری نین آیناسی دیر. ائله بیل بیر آلما یاریدان بولونوب.
باکی یا یاخینلاشدیقجا فرقینه واریردی. دونیا دییشیلیردی. آذربایجان دئمک ، باکی دئمک ایدی. باکی نین کوچه‌لری تبریزله عئینی دئییلدیر. تبریزده بیر یوخلوق، بوردا ایسه بیر وارلیق واریدی. باکی دا هر نه ایسته‌سئیدین ، هر نه‌یی آختارسایدین تاپا بیلردین. بورایا شرقله – قربین قووشدوغو بیر یئرده دئمک اولاردی. شرقین عنعنه سی قربین تفککوراتی بورادا بیرله‌شرک ، ساکیت بیر دونیا یاراتمیشدیر.
باکی دوغروداندا افسانه‌وی بیر شهردیر. بلکه ده بیزلره و شرقده یاشایانلارا. گئجه سی گوندوزوندن گؤزه‌ل و گوندوزو گئجه سیندن ماراقلی. بلکه ده اونون گئجه ایله گوندوزونده فرق یوخ ایدی.
نهایت بیر اورتا میقیاسلی مئهمانخانادا یئرله‌شرک نئچه گون باکی نی گزدی. بو نئچه گونده او باکی‌لا سیخ علاقه دار اولدو. آرتیق مدنییت اوجاقلاری ، موسیقی کانسئرواتوریاسینی تانیمیشدی. ایندی آرتیق بیر آیدان چوخ باکی دایدی.
سعید روستموف آدینا موسیقی کونسئرواتوریاسینا قبول اولوندو. هر گون سحر ساعات دوققوزدان – اون‌دؤرده‌جک اورادا مشق ائدیر و باجاریغینی گؤستریردی. فخری موعللیمین تاپشیریق و اؤیودلرین اونونمامیشدی. نئچه آیدان سونرا ، گروهون رهبرلیی طرفیندن باکی – دوولت موسیقی کانسئرواتوریاسینا قبول اولوندو. او آرتیق اؤزونه یئر تاپمیشدی. اورادا چالیشاراق بیر عوضو کیمی اورادا قبول اولوندو. گئجه – گوندوز چالیشیردی. تاپشیریقلاری یئرینه یئتیریردی. آنسانبیلین رهبری همیشه اونو گؤز اؤنونه چکیردی. اودا وار گوجو ایله چالیشیردی کی ، یئنی موسیقی اصولین ا‌یره نسین و موسیقیه هوه سین گؤسترسین.
هر گئجه تبریزی یوخودا گؤروردو. اونا دؤزوم و باجاریق باغیشلایان ائله بو یوخولاری ایدی. او چتینلیکلره تبریز عئشقیله دؤزوردو.
او باکی نی موسیقی عالمی سانیردی. بورادا موسیقی‌نین بوتون سیرلرینی اؤیره‌نه‌رک همیشه بیرینجی ایدی.
باشی قاریشدیغیندان آیلارین اؤتمه‌سینی بیلمیردی. ایندی آرتیق اؤزونه خصوصی یئر قازانمیشدی. مجلیسلرده صؤحبت اوندان گئدیردی. نئچه سئمفونیا یازمیشدی. دینله‌ییجی طرفیندن حرارتله قارشیلانمیشدی. هر صحنه‌ده دسته – دسته گوللرله آلقیشلانیردی.
نهایت دؤرد ایل گؤز قیرپیمیندا اؤتدو. او هله ده بیلیگه مئیلی واریدی. آمما اونو بیر ایستک تلسدیریردی. وطنده قالان حیسسلر اونو چاغیریردی. اونون اوشاقلیقی، اونون اوره‌کده قالان، قالاغا دؤنن حیسسی اونو چاغیریردی.
او ایندی موسیقی علمینین بوتون سیرلرینی اؤیره‌نمیشدی. او باشا دوشوردو کی ، وطنده اونا احتیاجی اولانلار چوخدور. اودور او وطنه قاییدیردی. قاییدیردی کی ، بیرده هئچ یئنی‌یئتمه‌نین سسی واختسیز باتماسین. قاییدیردی کی ، وطنده موسیقینی علمی شکیلده یایسین. او وطندن وطنه قاییدیردی.
***
نه واخت تبریزه یئتیشدیینی بیلمه دی. آوتوبوسدان دوشنده فخری موعللیمله بختیاردایی اونو قارشیلادی :
– خوش گؤردوک فخری موعللیم.
اونلار قوجاقلاشدیلار. بیر – بیرلرینی باغیرا باسدیلار. سونرا بختیارداییلا دا قوجاقلاشدی.
– هه ، بختیار دایی نئجه سن ؟
– ساغ اول اوغلوم. ساغ اول کی ، قاییتدین .
اونلار بیر یئرده ماشینا ایله‌شیب یئنه بختیاردایی‌نین قهوه خاناسیندایدیلار.
– هه ، دئه گوروم. نه وار نه یوخ. فخری موعللیم سوال وئردی.
– ساغ اول موعللیم. همیشه اؤیودلرین قولاغیمدایدیر.
– هه، او موسیقی فئستیوالیندا چیخیشین بیزلری لاپ سئویندیردی.
– او موسیقی سیزه حصر اولموشدو بختیاردایی. ایر اؤنجه‌دن قولاق وئرسه یدیز بیلردیز.
– نه فرقی وار اوغلوم. بوتون دونیا سنی آلقیشلادی . منده بیری.
– یوخ فرقی چوخدور. من ایر سیزی دوشونمه‌سه‌یدیم اصلا باجارمازدیم.
– یاخشی. دئه گؤروم. اورالاردا نه خبر ؟ بو دفه فخری موعللیم سوروشدو.
– اوستا بیر سمفونی یازمیشدیم. حاییف قویمادیلار. ائله بیل اورادا دا بیر آز چتینلیک وار. او سمفونی سیزه حصر اولموشدو. ائله بیل بودونیادا مندن سونرا سیزی باشا دوشن یوخدور. اولسون اونو من سیزه چالارام.
– اولسون اوغلوم. دونیا چوخ کیچیک دیر.
****
ایندی او گونلردن چوخ واخت کئچیر. آیدین تبریزده بیر تاکسی سوروجوسودور. هردن بیر دوست – تانیشلارینا موسیقی نومره لریندن پیانودا چالیر. او بیر اوخول آرزوسوایله یاشاییر. ایسته‌ییر کی، اؤیره‌ندیگینی بوتونلوکله اؤیرنجیلره اؤیره‌تسین. حاییف هله اونا زمین یارانماییب. او فخری موعللیم و حکیمله‌ده علاقه‌ده‌دیر. چالیشیر کی، هئچ کیمین سسی کورلانماسین.
او اینانیر کی ، بیر گون گله‌جک. اوخولا گئدیب، اؤیره‌ده‌جک .
