«أنایین» و «حسرت‌قولو»نون کلمه کسدیسی
(۱)سیزیف-و بوراخ، هولاگونو یاخالا
حسرت‌قولو: گئنه ندی میسیغیوی ساللامیسان؟
أنایین: ایکی داشین آراسیندا ازیلمیش کیمی‌یم. یاز، پؤز، دانیش، بیر میل آتدان، بیر میل اوستدن، اوچ ایلمه‌یی بیر ائله، گول سال، سونرا بیر ایلمک میلدن قاچسین، هر شئی بوشا چیخسین… سؤزلری توخو هاااا… توخو، سؤکولمه‌یی بیر دیرناغین ایلیشمه‌سینه بند‌دی! سیزیف ناغیلیدی بیزلرین یاشاییشی.
حسرت‌قولو اؤسگوردو. بوغازیندا قالمیش حسرت‌لری چارخانا دسمالینا آریتلاییب، دسمالینی یئرده‌کی کیتابین آلتیندا گؤزدن ایتیردی. دریندن بیر آه چکیب، دئدی: سیزیف-و بوراخ، هلاگونو یاخالا قیزیم! بولوسن کی هولاگو بیر قاریشقادان درس آلیب دا؟! جانیم سنه دئسین، گونلرین بیر گونونده، هولاگو ساواشدا اوتوزموش، لشکری داغیلمیش بیر حالدا اوتوروب فیکره گئتمیشدی. بیردن بیر قاریشقا گؤزونه ساتاشدی. قاریشقا اؤزوندن یئکه بیر یوکو بئلینه چاتیب، اوزویوخاری چیخماقدایدی. بیرآز گئتمه‌میش یوک یئره دوشوب دیغیرلاندی. قاریشقا گئنه یوکو بئلینه چاتیب، حامباللیغینی باشدان باشلادی. هولاگو ایش- پئشه‌سینی بوراخدی. اوتوروب، قاریشقانی گوددو. قاریشقانین نئچه دفعه اوزو یوخاری چیخماسینی سایدی. دوز ۶۱-جی دفعه ده قاریشقا یوکو یوواسینا چاتدیرماغی باشاردی.
أنایین: قاریشقا آتلی قاریشقایدی یا قره قاریشقا؟
حسرت قولونون گولمه‌یی توتدو. آز قالدی دوداغی قاچسین قولاغینین دیبینه. اؤزونو گوج- بیلـلاهینان توتوب، قاشلارینی ییغیب دئدی: قیزیم، بو یاشاییشدا سیمتن اولماغی اؤرگنمه‌لیسن.
حسرت قولونون سؤزو عنایین‌ین بئینینه باتدی. عئینی آچیلدی. گوله- گوله سوروشدو: زیرئه- قالخانلی سیمتن پهلوانلار کیمی اولمالییام، یوخسا عیشوه‌لی، ادا- اطوارلی سیمتن حوری‌لر کیمی؟
حسرت قولونون قوتو قورودو. حیرص‌نن دئدی: دور جهنم اول! دور چول- پالازیوی ییغیشدیر گئت گؤروم. منه باخ کی بیر ساعاتدی سنین کیمی أنایین‌نان آغیز- آغیزا وئرمیشم!
۹۴٫۶٫۶
