اوخوماق زامانی: 3 دقیقه

اشتراک گذاری در facebook
اشتراک گذاری در twitter
اشتراک گذاری در whatsapp
اشتراک گذاری در telegram
اشتراک گذاری در email
چئویرن: علیرضا ذیحق
ترجمه: علیرضا ذیحق
علیرضا ذیحق
00:00
00:00

بو یازی‌نین صوتی نسخه‌سی حاضرلانماییب. بو یازی‌نی اؤز سسینیزله اوخویوب بیزه گؤندره بیلرسینیز.

سؤيله‌ين علويه خانيم ( 70 یاشیندا- خوی)

گونلرين بيرينده  ايکي باجي وار ايدي. بيري دؤولتدي‌ايدي, بيري کاسيب. کاسيب باجي او قده‌ر مهربان‌ايدي کي بوتون وار يوخون وئرير دؤولتدي باجيسينا کي تزه دوغموشدي. بير توپ مخمر آلير. آمما دؤولتدي باجي اونو بَيَنمي‌ييب آتير ايت‌درين قاباغينا. کاسيب باجي‌نين اوره‌يي سيخيلير و ائله ناراحات اولور کي ائوه گليب چيخينجا وختين‌نن قاباخ سانجيسي توتور. آللاها يالوار ياخار ائلي‌ييب و کؤمح ايستير. بو حئين‌ده اوش پري اونون دؤوره‌سين آلير و بير قيز دونيايا گتيرير. پري‌لردن بيري دئييرکي من گولمه‌ييمي بو اوشاغا وئريرم و او ها زامان گولسه اطرافي گول چيچه‌يين‌نن دولاجاغ. بيري‌ده دئيير من آغلاماغيمي اونا وئريرم کي هر وخت آغلاسا آللاه اونو داردا قويمويا. اوچومجو پري‌نين‌ده بير شه‌وه گردنبدي وارايدي کي اونو باغلير اونون بوينونا.

کاسيب باجي‌نين ديزلرينه قووه‌ت گليب اوشاخ قوجاغيندا اؤزون يئتيرير ائولرينه و چوخ چَحمير کي قيزي‌نين گولمَح‌لري هر يئري گول چيچه‌يي‌نن دولدورور و اونناري ساتيب دؤولتدَنيل‌لر. قيزين‌دا آدين گولعوذار قويوللار.

اون- اون بئش ايل گئچير و گون او گون اولور کي دؤولتدي باجي کاسيب‌لير و قيزين‌دا گؤتوروب گئدير قالير باجيسي‌گيلده. بيرگون گولعوذار باغ باغاتي دولانيردي کي شاهين اوغلو اونو گؤرور و اورَح‌دن عاشيق اولور.گئدير قصره و حال احوالي آتا آناسينا آنلاداننان سورا گولعوذارا ائلچي دورورلار. کبين‌نرين کسيللر و خالاسي دؤشون وئرير قاباغا کي گَرَح من اونو آپارام قصره. قصره گئتمه‌يه گرَح اوتسوز سوسوز بير چؤل بيياباننان گئچرديلر کي خالاسي اونا نخشه ايشلير. شور کابابلار پيشيريب وئرير اونون دَمينه و نه قدر سو ايستير دئيير سو يوخدي. آز قالير اوره‌يي کاباب اولا کي خالاسي دئيير سويو فَقط بير شرطي‌نن وئررم کي قوياسان گؤزلزين چيخاردام. گولعوذار سوزلوق هاراي تَپيپ هوشدان گئديري و خالاسي تئز اونون گؤزلرين چيخاردير. اونون توي پالتارلاريني‌دا قيزينا گئيديريب گولعوذاري‌دا او جوره‌سينه چؤلده قويور. گئديب چاتيللار شاهزاده‌نين قصرينه و شاهزاده گؤرور کي بو قيز گولعوذار دَييل آمما سسيني‌ده چيخاتمير کي گؤره قضيه ندي.

گولعوذار آژ سوز قالير چؤلون اورتاسيندا و گؤزلرينین آغريسيننان آز قالير نفسي کسيله کي بير تيکانچي اونون سسين ائشيدير. تيکانچي دئيير سن تَح جانينا بوردا نه قئييره‌سن و گؤزلرینه نولوب کي گولعوذار دئيير:

–          فقط مني بوردان آپار کي سوزلوخ دان آز قالير جييه‌ريم چيخا .

تيکانچي اونو آپارير ائولرينه و قيزلارينا دئيير:

–          آللاه قوناغي‌دي وگَرَح موغاييت اولاخ گؤرَح کيم دي. باشي‌نين سرگوذشتي ندي.

تيکانچي‌نين اوچ قيزي وارايدي کي هاميسي اَل اَله وئريب گولعوذارا داوا درمان ائليرلر. نئچه گون‌نن سورا کي گولعوذارين حالي دوزه‌لير و اونو اؤزلريينن آپاريللار بولاخ باشينا. بولاخ باشيندا بير آغاج وارايدي کي گولعوذار اونون کؤلگه‌سين‌ده اوزانيب يوخويا گئدير. يوخودا ايکي قوش گؤرور کي آغاجين شاخه‌سين‌ده دانيشيرديلار و بير- بيرلرينه دئييريلر:

–          کاش گولعوذار بيزيم سسيميزي ائشيدردي . اونون گؤزلري خالا قيزي‌سيندادادي. بو آغاج‌دان ايکي يارپاق قوپارديب آتيرام کي گولعوذار اونلاري گؤتوروب ساخلامالي‌دي. گؤزلرين تاپيپ يئرينه قوياندا اگر اونلاري بو يارپاخلارينان باغلييا گؤزلري اوّل‌کي کيمي ساغ سلامت اولاجاخ. همي‌ده کاش گولردي کي هر يان گول چيَچح اولوب تيکانچي اونلاري قصره آپاريپ ساتاردي.

گولعوذار يوخودان آييلماخ همي گولور و تيکانچي‌نين قيزلاري گؤرورلر هريان دولدي گول چيچه‌يه. قيزلار گوللري ييغيب آپاريللار ائوه و گولعوذار تيکانچي‌دان ايستير او گوللري شاهزاده‌نين قصرينه آپاريب ساتا. آمما بير شرطي‌نن کي گوللري  پولوننان يوخ بلکه ايکي گؤزونن عوضلييه .

تيکانچي قصره گئديب گوللري ايستير ساتا کي گولعوذارين خالا قيزي‌سي اوننارا موشتري دورور. ايستير آلا کي تيکانچي دئيير:

–          بونناري نه قيزيلا ساتيرام نه پولا. بلکه ايکي گؤزونن عوض‌لييه‌جه‌يم. هرکسين واريدي او موشتري اولسون.

گولعوذارين خالا قيزي‌سي تئز او گؤزلري وئريب چيچح‌لري آلير و تيکانچي قئييدير ائوه. قيزلار کؤمَح‌له‌شيب گؤلعوذارين گؤزلريني قويوللار يئرينه و او قوشلارين وئردييي يارپاخلارينان باغليللار. چوخ چَحمير کي گولعوذارين گؤزلري توختور و اوّل‌لر کيمي ايشيلداماغا باشلير.

خالاسي‌نين کي خبري اولور قيزي نئچه دسته گول‌دن اؤتور گولعذارين گؤزلرين وئريب بير اَلي اولور بير باشي و سوروشا – سوروشا گئدير تيکانچي‌نين ائوينه. خالاسي گولعوذاري ساغ ساليم گؤرمَح همي باشلير ديل تؤحمه‌يه اونو باغيشلاسين کي بيردن بيره اَلي ايليشير اونون گردنبندينه و گولعوذار هوش‌دان گئدير. خالاسي گولعوذاري او حالدا بوراخيب شه‌وه گردنبندي‌ده گؤتوروب قاچير. تيکانچي‌نان قيزلاري کي گؤرورلر گولعوذاري يوخو آپاردي و نئنيللر آييلمير.

ائشيدَح شاهزاده‌دن کي گئجه‌ني ياتيب‌دي و يوخوسونا بير پري گلير. پري باشلير بوتون اولوب گئچه‌ني شاهزاده‌يه تعريف‌لير و شاهزاده يوخودان دورماخ همي گئدير شه‌وه گردنبندي گولعوذارين خالاسيننان آلير. سورا گئدير تيکانچي‌نين ائوينه و شه‌وه گردنبندي گولعذارين بوينونا باغلير. گردنبندي باغلاماخ همي‌ده گولعوذار يوخودان آييلير و ايکي سئوگيلي بير – بيرلريني تاپيپ قصره قئييديللر. شاهزاده‌نين امري‌نن يئددي گئجه‌نن يئددي گونوز توي توتوللار و گولعوذارين خالاسي‌نان قيزيني زيندانا وئريب اونلاري موجازات ائلير. تيکانچي‌نان قيزلارينادا پاداش وئريب اونناري قصره گتيتديرير.

————————————————————

  • ناغيلي سؤيله‌ين رحمتلي آنام علويه خانيم ( 1309-1379ه.ش)/ روايت تاريخي 2/10/1365 – خوي ( بو ناغيل ادبي ديل ده يوخ بلکه خوي لهجه‌سینده يازيليب)
اشتراک گذاری در print
چاپ

2 پاسخ

  1. سلام. علیرضا ذیحق بیگین فولکلوروموز حاققیندا گوتوردویو آددیملار اونودولماز دیر. خویلو یازیچیمیز حاققیندا بو گونلر خوی نگار نشریه سینین 25- نجی نمره سینده اوزون بیر مصاحبه بوراخیلمیشدیر. بو مصاحبه نی اوخودوقدا آداما بئله گلیر گوره سن علیرضانین چکدیگی زحمتلردن قدردانلیق ائتمک زامانی چاتماییبدیر. منجه خویلولار ال- قوللارین چیرمالاییب ایشه باشلامیرسالار باشقا شهرلرین یازیچی – شاعیر – ادیب- هوسکارلاری ایشه باشلاسینلار: علیرضا ذیحقین 40 ایله یاخین ادبیاتیمیز و خصوصیله فولکلوروموزون حاققیندا چکدیگی زحمتلره عشق اولسون.

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

علیرضا ذیحق

علیرضا ذیحق

باشقا اثرلری