چئویرن: محمد احمدی‌زاده
ترجمه: محمد احمدی‌زاده
محمد احمدی‌زاده

اینسانلارین یاشاییش طرزلرینی، جورابلاردا اولدوغو کیمی دوشونه بیلریک. بعضیلرینین حیاتی کیشی جورابلارینا، کیمی‌لرینینکی ده قادینلارین و قیزلارین جورابلارینا بنزر.
آمما چوخلو اینسانین یاشاماغی، کیشی جورابلارینین سوردوگو حیات کیمیدیر منجه.
یازیق جورابلار اوزون موددت، تردن … اییسی وئرن آیاقلاری تحممول ائدیب، اون، اون بئش گوندن بیر حاماما حسرت ده قالان او آیاقلارا قوناقلیق ائدرلر.
جورابلار تر ایله چیرکین قاریشیمیندان، قالینلیقدان آز قالا اودون پارچاسینا دؤنرلر. لئشیملری جیریلانا قدر پیس کؤکده گونلرینی گئچیررلر، آمما آیاقلارین صاحابی دوشونمز آدام، هئچ اولماسا بیر دفعه ده اولسون، مگر اونلاری سویون آلتینا توتارمی؟ یوخ کی، ائی تؤوبه!
هله! سیز جورابلارینی یوماسینی اؤتورون بیر یانا، آیاقلارینین تمیزله‌مه‌سینی یاددان چیخاردان او پیس پینتی کیشی، دیرناقلارینین اوزانیلماسینی او زامان فرقینده اولار کی، باش بارماقلارین اوزانمیش دیرناقلاری، یازیق جورابلارین بورونلارینی دلیب، دئشمیش اولارلار.
دلیک جورابلار، راحات اولدوقلارینی دوشونوب، آرتیق او کیشیدن جانلارینین قورتولماسینی خیال ائدرلر، آمما نه یازیق خبرلری اولماز کی آدام بو سفر ده جورابلارینی تای کئشیک گئیه‌جک. یانی ییرتیق یئرلر بو سفر ده جورو بارماقلارین اوستونه دوشه‌جک. دلیک دئشیک حیاتلارینی سوردورن او دیلسیز آغیزسیز جورابلار، اوزه‌رلرینده یئنی باجالار آچیلانا قدر، قیلیج کیمی دیرناقلارین صاحابی اولان آیاقلارا قوللوق ائتمه‌لیدیلر.
هله ایش بوردا سونا چاتماز کی. بو سفر ده سیرا گلیب یئتیشر، اینه ایله ساپا.
هه! بعضی اینسانلارین حیاتی، کیشی جورابلاری کیمی دلینیب، دئئشیلر و اونلارین یان یانا دوزولموش اولان ییرتیقلارینا، اوست – اوستده یاماقلار دؤشنیلر. ان سوندا دا اینجه‌جیک ایپلره دؤنوشن جورابلار کیمی، او اینسانلارین بیر دری بیر سوموک اولموش وجودلارینی مزارا تاپشیرارلار.
یوخ جانیم اوزولمه‌یین. حیات بو قدر ده آجیماسیز دئییل. البتده کی بو دونیادا خوشبخت جورابلاریمیزدا وار، پنبه‌ای، صورتی و یا چؤهره‌ای رنگلرده، هم ده اوستلری دولو گول، چیچک رسیملرله جورابلار. بو دونیا ساده‌جه، عؤمورلرینین سونونا دک، قاچا قاچدا اولان و کیشیلرین جورابلاری کیمی حیاتلاری دلیک دئشیک اینسانلاردان دولو دئییل کی. قیزلارین تر تمیز آیاقلاریندا، باربی شکلی اوزه‌رلرینده اولان پنبه‌ای جورابلاردا وار اطرافیمیزدا، بیرآز رنگلری سولونجا گئییلمه‌ین جورابلار و یا کیچیک بیر ایلمکلری قاچینجا، تقاییدا ( بازنشست = اَمَکلی) چیخان اینسانلار. حتتا، حیات آجیلاریندان ییرتیق یاماقلی اینسانلاردان دولو اولان عدالتسیز دونیامیزدا، بعضی دولابلاردا هله ده گئییلمه‌میش جورابلار تاپیلار، هم ده اوستلرینده ده قلب شکیللری اولان جورابلار.

چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

جورابلارین حیاتی

محمد احمدی‌زاده
www.ishiq.net

آذربایجان ادبیات و اینجه‌صنعت سایتی

جورابلارین حیاتی

محمد احمدی‌زاده
www.ishiq.net

آذربایجان ادبیات و اینجه‌صنعت سایتی

جورابلارین حیاتی

محمد احمدی‌زاده
www.ishiq.net

آذربایجان ادبیات و اینجه‌صنعت سایتی