«مَه‌یه قندهار سفری‌دی گِئده‌نمیییم! گئدننردن نه‌ییم اسکیح‌دی؟» دئدی.
«اسکیح ندی! سن گِئدننرین هامیسیننان باشسان آباجی!  آمما یئر قوتولوب؟ گئت مکّه‌یه، گئت …»
«بالا آخی من مکّه‌لیح دئییلم کی! مکّه‌یه گئده‌نین گَرح گؤزه‌گلیم مال- دؤولتی اولسون. پولونو پاه‌لاییب، سورا مکّه‌یه گئتسین. گَرَح یئددی قونشو اویانی، یئددی قونشو بویانی توخ اولسون. ایندی آدام بولمور کی ائولرده نه کئچیر. اوزاخدان باخاندا، آدام دئییر بس هامی توخدی. بیر ده کی سن اؤزگه دئییلسن کی، مکّه‌یه گئدن گَرَح مکّه‌سین ساخلاسین. یالان دانیشماسین، قئیبت ائله‌مه‌سین. گؤروسن دا اولمور کی، یئری گلنده، آدام بولمور بیرینین دالیجا دانیشیر،آنجاخ وار- دؤولت بیر یانا، مکّه‌نی ساخلاماخ هر آدامین ایشی دئییل»
«آخی سنین چین‌ده نه ایشین وار آباجی؟ یوخسا سنده پالتار تیجارتینه باخیسان بیزیم خبریمیز یوخدی!»
«بالا،  آلـلاه کیشی‌یه غنی- غنی رحمت ائله‌سین. آزدان- چوخدان قویوب گئدیب. آیلیغی دا زینه- زینه گلیر. ایلده بیر دفه هئیئت‌نن مَشَده گئدیرم. کربلا زیارتینه گئتمیشم. سوریه‌ده خانیم روقیه‌نی زیارت ائله‌میشم. چین-ی ده گؤرسم نه اولار؟ گوناه اولار؟!»
«آباجی، دئیه‌سن آیلیق‌لار جیبیوه آغیرلیق ائلیر هاااا»
آباجی کیفیندن بیر جوت پس‌انداز دفترچه‌سی چیخاردیر. دفترچه‌لر بیر رنگده، بیر بویدادیر. آما ایچینده‌ نه قدر اولدوقدلاریندان خبریم یوخدور. دفترچه‌لره دقت‌له باخیب بیرینی منه ساری توتور.
«بو دفترچه‌نین کی کفن- دفنیمه ساخلامیشام. قبیر داشی، احسان، مچیدین قت- چایی… ایسته‌میرم اؤلنن سورا رحمت یئرینه، لعنت اوخویالار.  رحمت‌لیح کیشی اؤز قبیرینین یانیندا منه ده یئر آلیب. بولوسن دا؟ دئییرلر ایندی او یئرلر ۲میلیوننان آرتیخدی. رحمت‌دیح عاغیللی‌ایدی. بیر شئی بولوردی، اؤزونه یئر آلاندا، منه ده آلدی.»
«آباجی، بئله کی گئدیر ماشاآلـلاه سن یوز ایل یاشییاجاخسان. هله هاراسیدی، تازا چین سفرینه گئدیسن!»
«کلبه فاطمانین نوه‌سی دئییر کی ماچینی گؤروبسوز، گئدین چینی ده گؤرون دا»
«ماچین هارادی آباجی؟»
«دئییر ائله سوریه‌زاد همان «ماچین» دی داااا. هله بولموسن، هر گئجه ییغیشیریخ کلبه‌فاطما گیله،  نوه‌سی بیزه مارکوپولون سفرنامه‌سینی اوخویور.»
«مارکوپولون یوخ، مارکوپولو، آباجی!… سیز هارا، مارکوپولو هارا….سفرنامه‌لره باخمایین، اورا گئتمح ائله ده آسان دئییل»
«بالا بیلیرم مارکوپولون،آت- قاطیر گوجونه گئدیب چاتیب، آمما ایندی او زامان دئییل کی. سوریه‌یه گئدنده، اوتوبوسون صندللری دؤشح کیمی راحات‌ایدی، اوزان یات، کیمین سنن ایشی وار!  بیر ده آددیم باشی شوفر اوتوبوسو ساخلییردی. دوشوردوخ هاوامیز دَییشیلیردی.  بیر چای ایچیردیخ. یول یولداشلاریمیزیننان دانیشا- دانیشا، بیر زامان گؤردوخ یئتیشمیشیخ.»
«سوریه هارا، چین هارا… چین اوزاخدی آباجی!»
«ایندی کیمه باخیسان، گزمحده، دولانماخدادی. او دو با، کوچه‌میزین باشینداکی باققالین آروادی، آیین بو باشی ایتستانبولدادی او باشی ائرمنستاندا. ایستانبولدان پار- پالتار، ائرمنستانان دا قَفَه‌دن زاددان گتیریر. بابالی دئین‌نرین بوینونا، دئییللر هله او زهرمارلاردان دا گتیریر. اما کلبه فاطمانین نوه‌سی دئییر کی او زهرمارلاری گتیرمَح اولماز. اری ائوده نی- قازان آسیر، ائرمنستان آدینا نئچه برابر باهاسینا میلیته ساتیر.»
«دئییرم یانی چین چوخ  اوزاخدی.  باخما مارکوپولویا، گزمح گؤیلوز ایستیر، یاخین یئره گئدین. ائله یئره گئدین کی بیر بالاجا دا دیللریندن آنلایاسیز. نه اولسون کی لالام، لال؛ کارام کار… بئله سفره گئتمه‌یین نه فایداسی»
«کلبه فاطمانین نوه‌سی دئییر کی تورلارین دیلمانجی وار، بیرده مه‌یر سوریه‌یه گئدنده عرب دیلی بیلیردیخ کی، ایندی ده چین دیلی باشاراخ!»
«هاااا…. دئه دا. قیز ائوینده کسیب- بیچیبلر. هر ایش قوتولوب، بیزیم خبریمیز یوخدی»
«قیز ائوی، اوغلان ائوینی بوشلا. دور آیاغی، او کامپیوتریوه باخ، دئییللر تورلارین هامیسی اوردا وار. باخ یا قاطار اولسون یا دا لاپ درجه یک اوتوبوس اولسون.»
«آباجی، باشیوا دولانیم، چین سوریه دئییل کی. چینه گرح طیاره‌ینن گئده‌سن»
«مَه‌یه جانیمی چؤلده تاپمیشام! اخبارا باخمیسان؟ هفته‌نین اوباش- بو باشی طیاره‌دی کی دوشور! بیرده کی من طیاره‌دن قورخورام. یادیندا نئچه ایل قاباخ تورکیه فیلیم‌لرینده‌کی شعبان، آیاغین طیاره‌یه قویماخدا سَحته ائله‌ییب اؤلدو؟»
«آباجی! دوز دئییرسن، سن مکّه‌لیخ دئییلسن. گَرَح تورلار چین مسافرلرینه گؤره بیر قاطار یولا سالسینلار»
92.۷.۱۵