چئویرن: محمد احمدی‌زاده
ترجمه: محمد احمدی‌زاده
محمد احمدی‌زاده

گئجه‌نین گئج ساعاتلاریدی. قویونلارین سسلری قورتولمور، تؤوله‌نی آلیبدی باشینا اونلارین مله‌مه سسلری. هئچ بیری یاتماق ایسته‌میر، یاخود یاتا بیلمیر. بوجاغین یاخینلیغیندا ایکی قویون اوز- به اوز بیری- بیرینه باخیر. آمما ندنسه بیری ساکین و سسسیزدی. هئچ‌ده مله‌میر.
سسسیز قویون  یانینداکی یولداشینا دئیر.
– آخی بو زاواللی‌لارا دئین یوخدور نه‌دن آغلیرسیز، آخیری اؤلومدو دا، یا قوربان بایرامی اولسون یادا باشقا بیر گون.
یولداشی قضبلی و آغلاییجی باخیشلاریلا اوزونو چئویرر اونا دئیر:
– هه دا، هامی سنین کیمی فیلوزوف اولماز کی. آخی! سنه من نه قدر دئدیم، گل بوردان قاچیب گئدک. هئچ سؤز ائشیتمه‌دین. گل ایندی بس نه ائده‌ک، صاباح قوربان بایرامیدی.
– آخی قوربانلیغین اوغلو قوربانلیق! هارا قاچایدیق؟
– واختیندا سن، او یاغلی قویروغونو ترپتسئیدین، چوخدان ایکیمیزده آوروپادایدیق.
– باخ گؤروم! مگر اوردا دا قویونلاری یئدیردیب ایچیردیب باشلارین کسمیرلرمی؟
– اولسون، اورالار یاشیللیق‌دی. ان آزی نئچه گونلوک عؤمورلرینده  قویونلارا زیر زیبیل، کؤهنه  کار- کاغیذ یئدیرتمیرلر.
سسسیز قویون، او بیری قویونلارین مله‌مه سسلرینین ایچینده یولداشینا دئیر:
– یوخ بالام. منیم یئریم ائله بو تؤوله‌دی. منیم بوردا آنیلاریم وار. باخ بیر! هله ده گئچن ایل قوربانا گئدن آتامین قوروموش قیغلارینی تؤوله‌نین او بوجاغیندا ساخلامیشام.
سسسیز قویون بو سؤزلری دئیر، بیردن قویروغونو ساغا سولا سیلکه‌لر. بیر نئچه قیغ دنه‌سی یولداشینین اوز- گؤزونه توخونار. سونرا آه چکر و بوجاغا ساری گئدر.
قضبلی قویون اونون دالسیجا دئیر:
– اولسون آتانین قیغلارینی دا اؤزوموزله آپاراردیق آوروپایا، شاعیر فیلوزوف قویون.
– اوهههههه، سن نه دئییرسن یازیق. تکجه آتام دئییل کی. سن بیر باخ بورا. آتامین قیغلاری وار، آنامین کی‌لار دا وار. آتامین آتاسی……… بؤیوک آتامین آتاسینین…آخی من بو قدر قیغی نئجه داشییا بیلردیم  آوروپایا.
یاخشیسی کی بوردا قالدیم. کؤهنه کار- کاغیذیمی، زیبیلیمی یئدیم. من اؤلندن سونرا دا قیغلاریم آنی اولاراق قالار اؤولادلاریما….

چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

قوربان گئجه‌سی تؤوله‌ده

محمد احمدی‌زاده
www.ishiq.net

آذربایجان ادبیات و اینجه‌صنعت سایتی

قوربان گئجه‌سی تؤوله‌ده

محمد احمدی‌زاده
www.ishiq.net

آذربایجان ادبیات و اینجه‌صنعت سایتی

قوربان گئجه‌سی تؤوله‌ده

محمد احمدی‌زاده
www.ishiq.net

آذربایجان ادبیات و اینجه‌صنعت سایتی