گؤيلرده اويون/ مرتضي مجدفر
نيگار و ياشار، آتا آنالاري ايله، شهرين ائشيگينده اولان، اگلنجه مئشهسينه گئتميشديلر. اونلارین بؤیوک دده و بؤیوک ننهلريده، اونلارلا دولانماغا گلميشديلر.
گونشلي بير گونایدي گویلره اوزانان اوجا آغاجلارین یارپاقلارینین خیشیلتیسی ائشيديليردي. آغاجلار، پارکین اویون یئرينين بوتون هنده‌وريني توتموشدو. عائلهلر پارکا چاتیب چاتمامیش، اوشاقلار یار یولداشلاري، همده باجی قارداشلاري و آتا آنالاري ايله اویناماغا باشلايیردیلار. اویون یئري چوخ بؤیوک بير یئرایدي و اوشاقلار اونون دورد بير یانینداکي جور به جور اویونلارلا ماراقلانیردیلار. اوردا فوتبال، آرادا ووردو، پيل – دسته، واليبال، جیزیق اویونو و ديگر اویونلاري اوینایان اوشاقلاري، همده بؤیوکلري گؤرمک اولوردو.
نيگار و ياشار، آتا آنالاري ايله آرادا ووردو اویناییردیلار. اونلارین اویونوندان بير ايکي ساعات کئچميش و گونش، گؤیون اورتالارینا چاتمیشدیر. اوشاقلار، آتالارينین اگيليب – دوزلمهسيندن، اونون یورغون اولماسین بيلديلر. ائله اونا گؤره، دؤشهديکلري و بابا ايله بؤيوک مامان اوتوران یئره قاییتماق ايستهديلر.
بؤیوک مامان، بالاجا گاز چیراغينین اوستونده چاي دوزلتميشدير. هامی چای ايچديلر. شيرينیده یئديلر. اوشاقلارین آتاسي، چای ايچن کيمي، یـئره سالینان دیالین اوستونده اوزاندی و بير آز کئچمهدن، یوخلادی. نيگار و ياشاردا چایلارین ايچديکدن سونرا، اوزاندیلار، آنجاق یوخلایا بيلمهديلر. اونلار هلهده اویناماق ايستهیيرديلر.
نيگار دئدي: ياشار اویون یئرينه باخ !
ياشار دئدي: هانسی اویون یئري ؟
نيگار جاواب وئردي: “گؤیلردهکي اویون یئريني دئیيرم. بولودلارین آراسیندا اولان یئري ” و سونرا اليايله بولودلاري گؤستردي. بولودلار گویون اوستونده، اویان بویاندا گؤزه دیيرديلر. همده هردن گونشين قاباغیني کسیرديلر.
ياشار دئدي: “هانسي اویون یئري؟ منکي بير زاد گؤرمورم . . .”
نيگار دئدي: ” اورایا باخ! اورایا! ساغ طرفدهکي بولودو گورورسن؟ زویولداغ دیر . . . “
ياشار دئدي: “هه، دوز دور . . . ائله بيل زویولداق دیر . . . “
سونرا نيگار گؤي اوزونون بير حيصه سيني گؤستريب دئدي: “اورایا باخ! بؤیوک قار توپو کيمي یئکه بير چرخيفلک! به به، نهده آغ آبپاق و گؤزل دير. “
یاشار دئدي: “دوز دئیيرسن – بؤیوک بير چرخيفلک، همده بيرگؤي زویولداغي…”
سونرا نيگار، ياشارین اليني توتوب، چوخ سئوينجله، گؤیون ان شمال طرفيني گؤستهريب دئدي: ” واه واه واه، گؤر نه قدهردير؟ گل سایاق ياشار! اوتوز بئش دنه گؤزل واوزون کوف!”
ياشاردا دئدي: “اورایا باخ! یاریسیندان چوخودا بوشدور . . . هئچ بير کيمسهده یوخدور. “
نيگارلا ياشار، گويلردهکي اویون پارکینی گزديلر و اورانین هر بير یئريني بيربيرلرينه گؤسترديلر. اونلار بو ايشدن ماراقلانیر، ایلنير و فرحلنيرديلر.
نيگار اویان بویانا باخدی. آتا هلهده یاتمیشدیر. آنا ايسه آبابا و بؤیوک مامانلا دانیشیردي. نيگار گؤز آلتيايله اونلاري ايزلهدي. بونلارا باخمیردیلار. سونرا چوخ یاواشجاسینا سسلندي: “خبرچيلر… خبرچي لر؟!”
او طرفلرده، دورد – بئش دنه خبرچي، هاوادا فیرلانیردیلار. دایاندیلار و دئديلر: هن! نه دئیير؟! بيزه بيزله ايشينيز وارایدی؟! “
نيگار، خبرچيلري اؤزونه ساري چاغیردی و اونلارین قولاقلارینا پیچیلدادی. بير آن سونرا، نيگار و ياشار، ائله اوزاندیقلاری کيمي گؤزلريني يومدولار. داها سونرا هرهسي بير خبرچينين توک کيمي قانادیندان یاپیشاراق، اوجا سسله دئديلر:
– ” خبرچيلر! خبرچيلر! بويورون. بيز گؤیلردهکي اویون مئیدانینا گئتمهليیيک” و نئچه ثانيه سونرا، داها اونلار اورادا دئیيلديلر. آتا یوخودان دورارکن و آنانین، آبابا و بؤیوک مامانلا دانیشیغی قورتارارکن، اونلار نيگار و ياشارین اورادا اولمادیقلارینی آنلادیلار. دوغرودان سيز بيلير سينيز نيگار و ياشار هارادا ايديلر؟!
یک پاسخ
ساغ اولون