(۱) ایشیق- کولگه اویونو

ساچدی گونش ساچاغین
بیزیم ائوه شوشه‌دن.
ایشیقلاندی هر بیر یئر
لاپ اوللی گوشه‌دن.

دوشدو کؤلگه‌م دوورا
اولدوم یئکه آدام تک.
بویوموشدوم دوواردا
اوجا بویلو آتام تک.

تاپمیشدیم من بیر اویون
«ایشیق-کولگه» اویونو.
الده اولان هر نه‌یین
اوخشاییردیم بویونو.

(۲) ویروس

قارا، کیفیر
اللری ایله
بیزیم ائوده
یاتدی ویروس.

اوز – گؤزومو
یالادی او
سونرا ایتیب
باتدی ویروس.

صاباح بیزه
قوناق گلدی
لاپ آرانی
قاتدی ویروس.

ساغ‌اوللاشما
زامانیندا
ناخوشلوغو
ساتدی ویروس.

ال وئرنده
اؤپوشنده
اؤز اوخونو
آتدی ویروس.

هامی گئجه
اؤسکوروردو
آرزیسنا
چاتدی ویروس.

(۳) بولودومسان گوزه‌لیم!

اوخشاییرسان قارقایا
هر دن گوزه‌ل قوش‌سان سن.
هم ده یئکه آغ فیله
بنزه‌دیرم سنی من!

یئل‌له، ال بیر اوچورسان
سن گئدیرسن هر یانا.
هر دن آغ‌سان گؤیلرده
هم آتاسان، هم آنا.

هر بویان وار، هر جورسن
سئویرم من، چوخ سنی‌.
«بولود»ومسان گؤزه‌لیم
شاد ائدیرسن سن منی.

سندن یاغیر قار- یاغیش
هامی سنی سئویرلر.
شنلیک اولور هر یئرده
کیفیرلیک‌لر گئدیرلر.

۱۶ آذر ۱۴۰۴- تهران