«سیدرضی حسینی» حیاتینی ده‌ییشدی. کئچن قیرخ ایلده، هر واخت تبریزه یولوم دوشوب، اونون صفالی ائوینده منت‌سیز- تمناسیز قوناق اولوب، دوز – چؤره‌یییندن و صنعتیندن فایدالانمیشام. منی، سید رضی ایله تانیش ائده‌ن عزیز دوستوم، اوستاد حبیب فرشباف اولموشدور. سیدرضینین ائوی، آذربایجان صنعتکارلاری‌نین اومید ائوی اولموش و هر بیر واخت اورایا باش ووردوقدا، یقین بیر نئچه چالقیچی و مغنی‌نی اورادا گؤرمک مومکون ایدی.
سیدرضی، تورکلر دئمیشکن، دوغروسو «صنعت هوسکاری» ایدی و اؤزه‌للیکله موسیقی ایله هوس‌لنیردی؛ قاوال اوستاسی ایدی؛ آنجاق باشقا صنعت‌لر، او جومله‌دن: آذربایجان شعری و نثری‌نینده مفتونو ایدی و گؤزه‌ل خطاطلیق صنعتی ایله ده ماراقلانیردی.
۱۳۸۰ و ۸۱ نجی ایللرده تهراندا بوراخیلان «اختر» هفته‌لییینه باش کاتیب اولدوغوم زامان، دئمک هر بیر گون، اوندان بیزه بیر مکتوب چاتاردی. او، مکتوبلاریندا منه آذربایجان ماهنی‌لاری‌نین یارانیشینی حئکایه و روایت شکلینده یوللایاردی. هر یازیسینا ایسه بیر گؤزه‌ل شکیل، هم ده ماهنی‌نین کاغاذ اوسته یازیلمیش نوت‌لارینی دا علاوه ائدردی. سید رضی، هم‌ده آذربایجان شاعر و یازیچی‌‌لاری‌نین حیات و یارادیجیلیغینا دایر کیچیک یازی‌لار دا تنظیم ائدیب، اخترین دفترینه یوللایاردی. بو یازی‌لارین بیر نئچه‌سی سیدرضینین آدی ایله اخترده چاپ اولوندو. آنجاق سیدرضی حسینی‌دن منه چاتان ان ده‌یرلی تحفه، ایکی یوز صحیفه‌لیک بیر خطاطلیق اولونموش شعر، بایاتی، آتالار سوزو و آذربایجانین تانینمیش سئچمه شعر نمونه‌لری ایدی. ایندی‌یه قده‌ر بو مجموعه‌دن اینستاگرامدا ایشله‌دیییم استوری‌لاردا فایدالانمیشام.
سیدرضی، صنعت وورغونو ایدی، خصوصیله ده موسیقی صنعتی‌نین. سوفره‌سی هر بیر زامان آچیق ایدی. آنجاق حیاتی چتین‌لیکله کئچیردی. او بیر چوخ آذربایجانلیلار کیمی سیزلاییب، ناله چکمه‌دن، آذربایجان سئوگیسی ایله یاشادی و بوتون آذربایجانلیلارا اومید قیغیلجیم‌لارین ایشیقلاندیردی. یولو قالارقی و قیغیلجیم‌لی اولسون.
مرتضی مجدفر
چئویرن: مرتضی مجدفر
ترجمه: مرتضی مجدفر
سسلندیرن: مرتضی مجدفر
- یادداشت
- اوخوماق زامانی: < 1 دقیقه
- https://ishiq.net/?p=34340
چاپ
