ایشیق 1
آذربایجان معلم‌لری و تحصیل مساله‌سی
ایشیق 2

آذربایجان قفه‌خانالاری

ایشیق 3

آذربایجان و مهاجرت مساله‌سی

ایشیق 4
آذربایجان توی‌لاری

yannis-ritsos-50ab41911cb49
صلح
يانيس ريتسوس- چئويرن: حسن ایلدیریم

 20-نجي عصرين بؤیوک شاعرلري سیراسیندا آدی بؤیوک حؤرمت و افتخارلا چکيلن یونانین اولو شاعري یانيس رتيسوس (2000-1909) 1977-نجي ايلده بلغارستاندا کئچيريلن دونیا یازیچی‌لارینین «صلح اوغروندا» 3-نجو قورولتایینا مشهور صلح شعريني بو پیغاملا او توپلانتی‌یا گؤندرميشدير.

 عزيز دوستلار!

تاسوف‌لر اولسون کي، من خسته‌ليیيم اوجوندان، بو اؤنملي توپلانتیدا، سيزين آرانیزدا اولا بيلمه‌یه‌جه‌یم. بو ییغینجاق سيزين اوچون نه قده‌ر اهميتلي‌ديرسه، منيم اوچون ده بير او قده‌ر اؤنملي‌دير. بو ییغینجاغین باشلیجا وظيفه‌سي و آماجی، اينسانلارین بير- بيرينه یاخینلاشماسی، اونسیت‌لرينین آرتماسی و ائله‌جه‌ده اونلارین آنلاشمالارینین درينلشمه‌سينده و ها بئله یئر اوزونده صلحون قورولماسی و قورونماسیندا اينجه صنعتین پایی حاقیندا، ائله‌جه‌ده اونون بو ايشده کي رولو و یوللاری باره‌ده فيکير مباديله‌سي آپارماق و تجربه‌لري و بيليک‌لريميزي پایلاشماق‌دان عبارتدير.

بو مسئله ان قديم زامانلاردان اينجه صنعتین باشلیجا آمالی اولموشدور. بوتون بشریتين حیاتی طلب‌لريندن دوغور. اينديیه‌دک بئله اولموش، بوندان سونرادا مطلق بئله اولاجاق. بو ايستک بؤیوک صنعتکارلارین، یازیچی و شاعرلرين یارادیجیلیغیندا اؤزونون دولغون بديعي تجسسومونو تاپمیشدیر. اينجه‌صنعت (اونون‌لا مشغول اولانلار یاخشی بيلير) هر جوره غیرانساني عمل‌لر و نيت‌لرله مبارزه دئمک‌دير. زوراکارلیغا، سيتمه، عدالت‌سيزليیه، یوخسوللوغا، استثمار و استعمارا و اؤلومه قارشی مبارزه دئمک‌دير. بو مبارزه آرادی- آراسی کسيلمه‌دن دوام تاپاجاق. او گونه‌جن کي اينسانلیق آزادلیغا قوووشوب راحات یاشایا بيلسين. ملت‌لر سرحدلرين اولدوغونا باخمایاراق بير-بيري ايله قارداشجاسینا یاشایا بيلسين‌لر.

چوخ تاسوف کي سيزين‌له یاخیندان تانیش اولوب اللرينيزي ايچدن‌ليک‌له سیخما و سئوينج‌لريمي پایلاشما فرصتي اليمدن چیخدی. آخي سيزين اثرلرينيز، حیاتیمین ان آغیر آنلاریندا، چتين گونلريمده، اوره‌یيمده قارداشلیق، یولداشلیق آرزولاریمی گله‌جه‌یه اوميد و اينامی ديري ساخلامیش‌لار. بيزيم غلبه چالاجاغیمیزا امين ائتميش‌لردي. من سيزه اؤز صميمي تبريک‌لريمي، آتشين سلاملاریمی، بيرده صلح عنوانلی شعريمي گؤنده‌ريرم کي، مني ده اؤز یانینیزدا حيس ائده‌سينيز. بو شعري یولداشیم و قلمداشیم «پاول ماتوو» واسيطه‌سي ايله گؤنده‌ريرم. بوشعری من 1953- نجی ایل 4ایل اؤنجه یونانین سیاسي محبوسلارین اؤلوم دوشرگه‌لري آدلاندیردیغی «لینموس ،ماکرونسیوس، آئیس ایسترابیس…» آدالاریندان آزاد اولدوغوندان سونرا یازمیشام و شاعر دوستوم قوستاس وارنالیس و دونیانین بوتون صلح سئورلرينه ايتحاف ائديرم.

توتدوغونوز بو شرفلي یولدا سيزه اوغورلار ديله‌یيرم و هامینیزی قارداشجاسینا باغریما باسیر و اؤپورم.

صلح

اوشاغین گؤردویو رؤیا،

آنانین گؤردویو رؤیا،

سئونلرين آغاج آلتیندا کي: سئوگي سؤزودور

                                                             صلح !

گؤزلري تبسملو

الي مئیوه‌ دولو زنبيللي

و آلنیندان

– پنجره قیراغینا سرينلمک اوچون قویولموش

ساخسی سو کوزه‌سي‌نين سیزینتی‌لاری کيمي –

تر دامجی‌لاری داما- داما

آخشام اوستو ائوينه قاییدان آتادیر

                                                   صلح!

دونیانین اوزه‌ريندن یارا ايزلريني سيلن

و بومبالارین قازدیغي چوخورلاردا آغاج اکن

داغلی اوره‌کلرده چيچک‌لنن اوميدلريميزدير!

                                                   صلح!

قانلاری‌نین هدر اولمادیغینی بيله‌رک

آرخایین- آرخایین بؤیرو اوسته اوزانیب اویویان شهيدلريميزدير‍

                                                                    صلح!

آخشام اوستو هر یئره یاییلان خورک قوخوسودور.

ماشینلارین یول اوستونده قورخوتمادان دایانماسی

دوست الي ايله آچیلان قاپی‌دیر

                                               صلح!

گؤیلرين رنگلي سسلرينه

ساعات باشی پنجره‌ني آچیب

گؤزلريميزي اوخشایان شن گؤیلره باخاراق

                        بایرام ائتدیيميز چاغ‌دیر.

                                            صلح!

اویوموش اوشاغین اؤنونده کي بير پيالا ايستي سوت و آچیق کيتابدیر.

                                                                          صلح!

بوغدا سونبوللري‌نين« ایشیق»!« ایشیق»! – دئیه

                                                      مؤژ وئرمه‌سي

و اوفوق‌لرين اووجونون ایشیق‌لا دولوب- داشدیغی آن‌دیر.

                                                               صلح!

دوستاقخانالارین کيتابخانالارا چئويرلمه زامانی

گئجه‌لرده نغمه‌لرين قاپی-قاپی دولاشدیغی آن

و هفته سونو، اوزونو قیرخدیریب، تر- تميز گئیينيب

– باهاردا آی بولوتدان چیخان کيمي-

دللک دوکانیندان بير ايشچي‌نين چیخدیغی زاماندیر.

                                                      صلح!

بوش کئچمه‌ميش بير گون

ائله اوغورلو بير گون کي، کوکونون سئوينج یارپاقلاری گئجه‌لرده آچیلان؛

سنين شيرين یوخوندا.

یاراقلانیب،غم-غصّه‌ني دونیادان قووماغا

                                    چیخماغا تله‌سن گونش‌دير

                                                             صلح!

تارلالارین باشیندا ایشیق چلنگي

سحرلرين ديزي اوستونده کي گؤزه‌لليک کيتابی‌دیر!

                                                               صلح!

«قارداش» – دئدیين، «صاباحی قوراجاییق» – دئدیين زامان؛

یاراداجاغین صاباحا اوخودوغون نغمه‌لردير

                                                     صلح!

اوره‌کلرده اؤلوم قورخوسونو سیخیشدیریب،

پنجره‌لرين، سعادتين اوزونه آرخایین- آرخایین آچیلماسی

ایکیندیلرده، واختین بؤیوک قرنفيلينین

شاعرله، ايشچي‌یه عئیني سئوينجله

                                عطري‌نين ساچیلماسی‌دیر.

                                                         صلح!

اينسانلارین قارداشجاسینا سیخدیغی اللردير.

                                                      صلح!

دونیانین سوفره‌سينده کي چؤرک

آنالارین دوداقلاریندا کي گولوش‌دور

باخ بونلاردیر صلح، باشقا شئی دئیيل!

آچیلان سحرلريميز

درين- درين ايزلر سالاراق بير سؤز یازاجاق:

صلح … صلح … صلح!

شعرلريميزين ميصراعلاریندا

بوغدا یوکلو، قیزیل گول یوکلو

گله‌جه‌یه دوغرو گئدن قاتاردیر.

                                    صلح!

بوتون دونیا، بوتون رؤیالاری‌لا

صلحون قوینوندا درين- درين نفس آلاجاق

الينيزي- اليميزه وئرين قارداشلاریم!

باخ بودور صلح!

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *