دمیر پنجرهلره
قاپادی گؤزلرینی
ایچینده آچیلدی گؤیلر…
یاغیشلارین سئوینجی -گؤی قورشاغینا
گولومسهین باغلار، تارلالار، بوستانلارکیمی؛
سئوینج یاشلارینین ایچیندن ساچیلان گولوشلره گولدو ایچی.
گؤیلر ماوی
آغاجلار یاشیل
زمیلر ساری
و
گؤزلر قارا.
ایچینده بوی آتدی
ایستکلر، آرزولار، اومیدلر
بیر اوچوملوق ماویلییه بوکولموش قارا گؤزلرین حسرت آلووندا آلیشدی!
یاشیل یوموشاقلیغا ساریلان بیر اسیملیک نسیم
قارا گؤزلونون یانان کؤنلونده اسدی!
ایچینده گؤیردی، گوللندی، سونبوللندی
فیدانلار، سونبوللر، تاغلار،
ایچینده دوغدو آی
ساچدی اولدوزلار.
دورولدو
یونگوللشدی
بولاقلارین شووقو یاییلدی جانینا؛
گؤزلرینده اوفوقلر آغاردی، شفقلندی
جانینی ساردی اینسان باخیشلاری،
قوش سسلرینین رنگی، یئمیشلرین عطری.
قارا گؤزلرده آچیلان سحر
ماویگؤیلرده ساری گونش
و
گونشله اوزون اوزادی اویونا گیرمیش
اوجا بویلو
گونه باخان!
1390
