کؤنلومده بیر سئودا یاندی، یاخیلدی
اوره‌کدن گیلئیلی، گؤزدن گیلئیلی.
جانیمدا نغمه‌‌لر خال- خال گؤینه‌دی
دوداقدان گیلئیلی، سؤزدن گیلئیلی.

اریدیم ایچیمده گیله- گیله هئی،
ایستیمی پایلادیم آیا، ایله هئی،
دؤندوم بیر اوجاقلیق ایستی کوله هئی
اوجاقدان گیلئیلی،کؤزدن گیلئیلی.

بیر آرزومدا مین آرزومو یاشادیم،
بیر عؤمورون ایچ اوزونو یاشادیم،
باهاریمدا پاییزیمی یاشادیم
پاییزدان گیلئیلی، یازدان گیلئیلی.

گؤردیوم یوخو‌‌لار‌‌ یوزولو قالدی،
اوره‌ک ایسته‌ییندن اوزولو قالدی،
آلنیمین یازیسی پوزولو قالدی
گوزگودن گیلئیلی، اوزدن گیلئیلی.

اومیدیم گیزلندی گومان ایچینده،
مایاغیم بوغولدو عمان ایچینده،
یولوم هاچا‌لاندی دومان ایچینده
جیغیردان گیلئیلی، ایزدن گیلئیلی.

آلنی کؤلگه‌لی‌نین گوندوزو گولور،
گونوم گؤی اسکی‌یه یئنه بوکولور،
قوردوغوم دونیا دا اوچور، تؤکولور
اؤزوندن گیلئیلی، بیزدن گیلئیلی.
1368- تهران