گونش بوزاریر
تورپاق بوزاریر
گؤز ایشله‌دیکجه بوزلوق
پوزغونلوق!
جانیما ساریلان قیزیل گول‌لرین عطری
هاردان، هارا‌لاردان ساچیلمیش گؤره‌سن؟!
بوز داغ‌‌لاردان قوپموش بوز کولک‌لر
اولاشیر چیلپاق باغ‌لاردا
اوره‌ییمدن کئچن یاشیل ایاقلی باهار
هاردان، هارا‌لاردان جانیما یول آچمیش گؤره‌سن؟!
بیر- بیرینه قاریشیب
کولک‌لر، للک‌لر، قاریلتی‌لار،
باغلارین قولاغینا دولوب
خزان سسی، قارغا سسی، کولک سسی،
یاز نغمه‌لی بو سس‌لر، بو قاناد سس‌لری
هاردان، هارا‌لاردان گلیر گوره‌سن؟!
سحردن بری
باشقا فصیل‌ایچینده‌یم:
کؤنلومده توراغای‌لار اوخوشور
جانیمدا قوش‌لار اوچوشور
اوره‌ییمده باهار دیرچه‌لیر
خیالیمدا سن گولورسن؛
ایچیمده کی آخار باخاری
بوروموش الوانلیق
آیدین لیق.
۱۳۷۰- تهران
