باشیم اوستن آی‌‌لار،‌‌ ایل‌لر‌ اؤتوشور،
شوه‌ ساچ‌‌لار‌‌ آغ گوموش‌له باریشمیر.
سون باهاریم ایلک یازیم‌لا گؤروشور،
کؤنول یازیم گلن قیش‌لا باریشمیر.

بوللور گون‌لر‌، گئینش گون‌لر‌ دارالیر،
گؤی بوزاریر آغ اوفوق‌لر‌ قارالیر،
یاشیللیق‌‌لار‌‌ آوازییر، سارالیر،
باخیش‌‌لار‌‌یم بوز ناخیش‌لا باریشمیر.

گونوگوندن توکون تؤکور بو عؤمور،
اوره‌ییمین داغی آرتیر بیربه‌بیر،
رؤیالار‌‌یم آرزو دونون سویونور،
قارانقوشوم قاراقوش‌لا باریشمیر.

عؤمروموم چاتیب ارزورومون داغینا،
قوشوم اوچوب «خان اصلی»مین باغینا،
اوره‌ک باخمیر قاراسینا، آغینا،
آیاق‌‌لار‌‌یم یور- یوخوش‌لا باریشمیر.

اولو داغین او اوزونده بیر اودا،
اوردا چاتسام اود ایچینده ‌مورادا،
گوره‌جکسن آه‌دان قوپان او اود دا
ایلدیریم تک یار- یاغیش‌لا باریشمیر.
1367