۱۵ ایل اول، شهریور آیی‌نین ۱۲-سینده، «ایشیق» سایتی آذربایجان مدنیتینین درینلیگیندن گلن ایشیغی جمعیتیمیزه چاتدیرماق اوچون آددیم آتدی. دوز ۶۵ ایل اول، ائله بو گون آذربایجان خالقی اؤز مدنیتینی و میللی کیملیگینی دونیایا اعلان ائتمیشدی. بو ایکی مهم حادثه‌نین عینی گونه تصادف ائتمه‌سی موبارک بیر حادثه‌دیر.
«ایشیق» سایتی بیر اوشاق کیمی گون-گونه بؤیویه‌رک، ۱۵ ایل عرضینده یئتگینلشیب ارگینلیگه چاتیبدیر. بو گون دئمک اولار کی، بو سایت آذربایجان ادبیاتی و اینجه‌صنعتی‌نین پارلاق گوزگوسودور. البته کی، بو «اوشاغین» اؤز آیاقلاری اوزه‌رینده دوراراق یئتکینلشمه‌سی آسان اولماییب؛ اونا چکیلن زحمت و چتین‌لیکلره قارشی دورماق یالنیز سؤنمز سئوگی و درین بیر اینام طلب ائدیر؛ یوزلرله متنی اوخویوب، املاء و اوسلوب خطالارینی دوزلتمکله، عینی زاماندا مسئولیت حسی ایله اثرین اصالتینی قوروماق، ساده بیر ایش دئییل. یالنیز بو چتین پروسئس‌لری گؤره‌ن و بو یولو کئچن‌ اونلارین امه‌یینی ده‌یرلندیره بیلرلر.
بئله بیر زحمتین نتیجه‌سی ده عینی درجه‌ده ده‌یرلی اولمالی‌دیر. سوال وئرمک اولار: «ایشیق» سایتی نئچه شاعری، یازیچینی و صنعتکاری ایلک دفعه بیزیم مدنیتیمیزله تانیش ائتدی؟ نئچه گنج و یئنی یئتمه استعدادین ایلک اثرینی یاییملایاراق، اونلارین گله‌جک انکشافینا زمین یاراتدی؟ کئشگه امکان اولایدی صنعتکارلاریمیزین ایلک اثرلری ایله بوگونکو اثرلری اوخونوب، ده‌یرلندیریلئیدی. اونلارین بو مدتده یئتگینلشمه‌سی و انکشافی قضاوته بوراخیلئیدی. آیدین‌دیر کی، بو انکشاف تکجه فردی بیر حادثه دئییل؛ اوندان داها آرتیق، بو یوکسلیش، بیزیم دیلیمیزه، ادبیاتیمیزا و مدنیتیمیزه عاید اولان لیاقتله قارشیلانمالی بیر حادثه‌دیر.
دوغروداندا «ایشیق» سایتی بیر برابرلیک گوزگوسودور. بورادا بوتون ادبی مکتب‌لردن، همچینین اجتماعی-سیاسی مسلک‌لرین موختلیف نماینده‌لرینین اثرلری درج اولونور. سایتدا فولکلور خزینه‌میزدن عاشیق شعرلرینه، غزل‌دن قوشمایا، مودئرن و پوست‌مودئرن شعرلره قده‌ر هر نوع اثر تاپماق مومکوندور. بو، سایتین مدیرلیگی‌نین و امکداشلارینین گئنیش دونیاگؤروشونه عاید بیر اوغوردور.
من «ایشیق» سایتی‌نین مدیر و باش یازارینا و اونون بوتون زحمتکش امکداشلارینا اوره‌کدن تشککور ائدیر، اونلارین ایزله‌دیکلری مقصدین قارشیسیندا باش اییرم.