لامپا ایشیغی‌نین قفیل ساچیلیشیندان کیشی‌نین گؤزلری قاماشدی. اوغلان، «بس نییه چیراغی یاندیرمیرسان؟»- دئیه، الینده‌کی چانتانی موبلون اوستونه قویدو. کیشی، میزه دیرسکلنمیش اللرینی گیژگاهیندان گؤتوروب گؤزونون اوستونه قویدو. «یانا، یانمییا فرق ائله‌مز، گؤزلریم دای سئچمیر»- دئیه گؤزلرین اوووشدوردو. سونرا کیتابی بوکوب، سیگار آلیشدیردی:
اوغلان تلویزیونو آچدی؛ گئدیب ایکی استکان چای سوزوب گتیردی.
– آخشام‌چاغی‌نین سرینینده نه عجب قدم وورماغا گئتمیرسن؟
کیشی هئچ بیر سؤز دئمه‌دن سیگارین چکیردی.
– دئییرم آی آتا! بیر عؤمور چکیش- برکیش، اوخویوب یازماغی‌نین نتیجه‌سی نه اولدو؟
– او کی گره‌ک اولئیمیش اولدو بالا!
– یانی، بویورورسان آلین یازیسی‌ایمیش؟
– یوخ، آلین یازیسی دئییل، چیخاریمیز بو ‌ایمیش.
کیشی کؤکسون اؤتوردو. نئچه لحظه‌دن سونرا دئدی:
– من بو نئچه ایلده بونو باشا دوشموشم.
– بس ایندی نئجه اولاجاق؛ ایندی کی اولدوغوموزدان اولموشوق؟
– ایکی یول وار اوغول! یا گره‌ک بیز جاوانلاشاق، یاداکی جاوانلاریمیز قوجالاشالار…
تلویزیوندان یاییلان سس بیر آن‌دا باغیرتی‌یا چئوریلدی: «گل…! گل…! گل…!» اوغلان یئریندن سیچرادی. دلیجه‌سینه آتیلیب دوشه‌رک، سسینی تلویزیوندان داشلانان آلقیش سس‌لرینه قاتدی: «مساوی… مساوی …، مساوی.»
***
کیشی تلویزیون قاباغیندا دیرسکله‌نن اوغلانی سسله‌دی:
– چای بوزا دؤندو، دور گل چاییوی ایچ!
اوغلان: «ایچمیرم، بوشلا!»- دئییب، سونرا سوروشدو:
– آتا سن دئییرسن بیز اوتاریق، یا اوتوزاریق؟
کیشی بیر داها کؤکسون اؤتوردو. توتغون سسله: «بئله گئتسه اوتوزاریق اوغول! اوتوزاریق»- دئدی.
1387- یاز