۲۰-نجی عصرین بؤیوک شاعرلری سیراسیندا آدی بؤیوک حؤرمت و افتخارلا چکیلن یونانین اولو شاعری یانیس رتیسوس (۲۰۰۰-۱۹۰۹) ۱۹۷۷-نجی ایلده بلغارستاندا کئچیریلن دونیا یازیچی‌لارینین «صلح اوغروندا» ۳-نجو قورولتایینا مشهور صلح شعرینی بو پیغاملا او توپلانتی‌یا گؤندرمیشدیر.
عزیز دوستلار!
تاسوف‌لر اولسون کی، من خسته‌لیییم اوجوندان، بو اؤنملی توپلانتیدا، سیزین آرانیزدا اولا بیلمه‌یه‌جه‌یم. بو ییغینجاق سیزین اوچون نه قده‌ر اهمیتلی‌دیرسه، منیم اوچون ده بیر او قده‌ر اؤنملی‌دیر. بو ییغینجاغین باشلیجا وظیفه‌سی و آماجی، اینسانلارین بیر- بیرینه یاخینلاشماسی، اونسیت‌لرینین آرتماسی و ائله‌جه‌ده اونلارین آنلاشمالارینین درینلشمه‌سینده و ها بئله یئر اوزونده صلحون قورولماسی و قورونماسیندا اینجه صنعتین پایی حاقیندا، ائله‌جه‌ده اونون بو ایشده کی رولو و یوللاری باره‌ده فیکیر مبادیله‌سی آپارماق و تجربه‌لری و بیلیک‌لریمیزی پایلاشماق‌دان عبارتدیر.
بو مسئله ان قدیم زامانلاردان اینجه صنعتین باشلیجا آمالی اولموشدور. بوتون بشریتین حیاتی طلب‌لریندن دوغور. ایندییه‌دک بئله اولموش، بوندان سونرادا مطلق بئله اولاجاق. بو ایستک بؤیوک صنعتکارلارین، یازیچی و شاعرلرین یارادیجیلیغیندا اؤزونون دولغون بدیعی تجسسومونو تاپمیشدیر. اینجه‌صنعت (اونون‌لا مشغول اولانلار یاخشی بیلیر) هر جوره غیرانسانی عمل‌لر و نیت‌لرله مبارزه دئمک‌دیر. زوراکارلیغا، سیتمه، عدالت‌سیزلییه، یوخسوللوغا، استثمار و استعمارا و اؤلومه قارشی مبارزه دئمک‌دیر. بو مبارزه آرادی- آراسی کسیلمه‌دن دوام تاپاجاق. او گونه‌جن کی اینسانلیق آزادلیغا قوووشوب راحات یاشایا بیلسین. ملت‌لر سرحدلرین اولدوغونا باخمایاراق بیر-بیری ایله قارداشجاسینا یاشایا بیلسین‌لر.
چوخ تاسوف کی سیزین‌له یاخیندان تانیش اولوب اللرینیزی ایچدن‌لیک‌له سیخما و سئوینج‌لریمی پایلاشما فرصتی الیمدن چیخدی. آخی سیزین اثرلرینیز، حیاتیمین ان آغیر آنلاریندا، چتین گونلریمده، اوره‌ییمده قارداشلیق، یولداشلیق آرزولاریمی گله‌جه‌یه اومید و اینامی دیری ساخلامیش‌لار. بیزیم غلبه چالاجاغیمیزا امین ائتمیش‌لردی. من سیزه اؤز صمیمی تبریک‌لریمی، آتشین سلاملاریمی، بیرده صلح عنوانلی شعریمی گؤنده‌ریرم کی، منی ده اؤز یانینیزدا حیس ائده‌سینیز. بو شعری یولداشیم و قلمداشیم «پاول ماتوو» واسیطه‌سی ایله گؤنده‌ریرم. بوشعری من ۱۹۵۳- نجی ایل ۴ایل اؤنجه یونانین سیاسی محبوسلارین اؤلوم دوشرگه‌لری آدلاندیردیغی «لینموس ،ماکرونسیوس، آئیس ایسترابیس…» آدالاریندان آزاد اولدوغوندان سونرا یازمیشام و شاعر دوستوم قوستاس وارنالیس و دونیانین بوتون صلح سئورلرینه ایتحاف ائدیرم.
توتدوغونوز بو شرفلی یولدا سیزه اوغورلار دیله‌ییرم و هامینیزی قارداشجاسینا باغریما باسیر و اؤپورم.
صلح
اوشاغین گؤردویو رؤیا،
آنانین گؤردویو رؤیا،
سئونلرین آغاج آلتیندا کی: سئوگی سؤزودور
صلح !
گؤزلری تبسملو
الی مئیوه دولو زنبیللی
و آلنیندان
– پنجره قیراغینا سرینلمک اوچون قویولموش
ساخسی سو کوزه‌سی‌نین سیزینتی‌لاری کیمی –
تر دامجی‌لاری داما- داما
آخشام اوستو ائوینه قاییدان آتادیر
صلح!
دونیانین اوزه‌ریندن یارا ایزلرینی سیلن
و بومبالارین قازدیغی چوخورلاردا آغاج اکن
داغلی اوره‌کلرده چیچک‌لنن اومیدلریمیزدیر!
صلح!
قانلاری‌نین هدر اولمادیغینی بیله‌رک
آرخایین- آرخایین بؤیرو اوسته اوزانیب اویویان شهیدلریمیزدیر
صلح!
آخشام اوستو هر یئره یاییلان خورک قوخوسودور.
ماشینلارین یول اوستونده قورخوتمادان دایانماسی
دوست الی ایله آچیلان قاپی‌دیر
صلح!
گؤیلرین رنگلی سسلرینه
ساعات باشی پنجره‌نی آچیب
گؤزلریمیزی اوخشایان شن گؤیلره باخاراق
بایرام ائتدییمیز چاغ‌دیر.
صلح!
اویوموش اوشاغین اؤنونده کی بیر پیالا ایستی سوت و آچیق کیتابدیر.
صلح!
بوغدا سونبوللری‌نین« ایشیق»!« ایشیق»! – دئیه
مؤژ وئرمه‌سی
و اوفوق‌لرین اووجونون ایشیق‌لا دولوب- داشدیغی آن‌دیر.
صلح!
دوستاقخانالارین کیتابخانالارا چئویرلمه زامانی
گئجه‌لرده نغمه‌لرین قاپی-قاپی دولاشدیغی آن
و هفته سونو، اوزونو قیرخدیریب، تر- تمیز گئیینیب
– باهاردا آی بولوتدان چیخان کیمی-
دللک دوکانیندان بیر ایشچی‌نین چیخدیغی زاماندیر.
صلح!
بوش کئچمه‌میش بیر گون
ائله اوغورلو بیر گون کی، کوکونون سئوینج یارپاقلاری گئجه‌لرده آچیلان؛
سنین شیرین یوخوندا.
یاراقلانیب،غم-غصّه‌نی دونیادان قووماغا
چیخماغا تله‌سن گونش‌دیر
صلح!
تارلالارین باشیندا ایشیق چلنگی
سحرلرین دیزی اوستونده کی گؤزه‌للیک کیتابی‌دیر!
صلح!
«قارداش» – دئدیین، «صاباحی قوراجاییق» – دئدیین زامان؛
یاراداجاغین صاباحا اوخودوغون نغمه‌لردیر
صلح!
اوره‌کلرده اؤلوم قورخوسونو سیخیشدیریب،
پنجره‌لرین، سعادتین اوزونه آرخایین- آرخایین آچیلماسی
ایکیندیلرده، واختین بؤیوک قرنفیلینین
شاعرله، ایشچی‌یه عئینی سئوینجله
عطری‌نین ساچیلماسی‌دیر.
صلح!
اینسانلارین قارداشجاسینا سیخدیغی اللردیر.
صلح!
دونیانین سوفره‌سینده کی چؤرک
آنالارین دوداقلاریندا کی گولوش‌دور
باخ بونلاردیر صلح، باشقا شئی دئییل!
آچیلان سحرلریمیز
درین- درین ایزلر سالاراق بیر سؤز یازاجاق:
صلح … صلح … صلح!
شعرلریمیزین میصراعلاریندا
بوغدا یوکلو، قیزیل گول یوکلو
گله‌جه‌یه دوغرو گئدن قاتاردیر.
صلح!
بوتون دونیا، بوتون رؤیالاری‌لا
صلحون قوینوندا درین- درین نفس آلاجاق
الینیزی- الیمیزه وئرین قارداشلاریم!
باخ بودور صلح!
