آژیردن آژیره
حبیب فرشباف
غزه فاجیعه‌سینی دوشونرکن، ایران- عراق موحاریبه‌سی ایللری یازیلان بیر شعر تقدیم اولور.
اویغوسو سکسکه‌لی،
کؤنلو هیجران لکه‌لی؛
دوننی گونش خیاللی، افتخارلی،
بو گونو –
شاختالی، قارلی تبریزیم.
تبریزیم کدرلی، تبریزیم یاسلی،
قوللاری زنجیرلی، زنجیری پاسلی.
باخ! نئجه ده‌ییشیبدیر وطنیمین گؤرکمی!
آخ، اود آلتیندا کول کیمی؛
آخ، کول آلتیندا اود کیمی.
آیسیز گئجه‌لرینده اوزون گولمه‌دی بیر آن؛
گوزلرین نیگران،
کؤنلون نیگران.
آج جاناوارلار کیمی اوولادی آژیر یئنه،
بو سسدن بوتون شه‌هر دیسکیندی بیردن- بیره.
قیرمیزی وضعیّتدن
سارالدی، سولدو رنگی،
ساپ- ساری اولدو رنگی-
بوسبوتون آنالارین،
بوسبوتون بالالارین.
آغیر ماتم سوکوتو-
بورودو باشدان باشا قهرمان شه‌هریمی.
آنالارین قوینونا
بیر اوووج یوماق کیمی قیسیلمیشدی بالالار؛
نئجه ده اوزون سورور
بو سوکوت بو انتظار.
چیخیب قاچماق ایسته‌دی کؤنول قوشو قفسدن؛
بیر داها چیرپینمادی اوره‌ک، دوشدو نفسدن.
شه‌هر سس‌سیز، سمیرسیز
طیلیسمدن داشا دؤنموش بؤیوک قهرمان کیمی،
گؤزلرینی قارانلیق بورویوب دومان کیمی.
بیر چوپ‌ده قیمیلدانمیر،
بیرجه چیراقدا یانمیر.
اؤلوم قوشو شه‌هرین باشی اوسته دولانیر؛
دمیر قاناد بو قوشو
هر کس یالنیز اؤزونون باشی اوستونده سانیر.
گؤزلر برلمیش حالدا زیلله‌نیب قارانلیغا،
قولاقلار داری دلیر،
تکجه قارا اؤلومون آیاق سسلری گلیر.
بیردن دیسکینیر تورپاق بومبالارین سسیندن؛
شوشه‌لر پَرم- پَرم داغیلیر وحشتیندن.
آغارینجا وضعیت
آرتیق قارالمیش اولور یوزلر اینسان طالعی
قاریشیر تورپاقلارا
یوزلر انسان آرزوسو،
یوزلر انسان دیله‌یی.
بیردن گؤزلریم دولور منیم بو فاجیعه‌یه؛
منه بیر جواب وئرین:
– آخی نه اوچون،نییه-
بو قده‌ر قانلار هله…؟
آخ، قان ایچن جلاّدلار گوزلرین دویورماییب،
او یئنه قان- قان دئییر؛
او هئچ نه قانماسادا،
زامان اونا- قان! دئییر.
زامانین ایسته‌یینه بویون اَیمه‌سه آنجاق،
آخیتدیغی قانلاردا نهایت بوغولاجاق.
۱۳۶۵
