باشقا فصیل
حسن ایلدیریم
گونش بوزاریر
تورپاق بوزاریر
گؤز ایشله‌دیکجه بوزلوق
پوزغونلوق!
جانیما ساریلان قیزیل گول‌لرین عطری
هاردان، هارالاردان ساچیلمیش
گؤره سن؟
بوز داغ‌لاردان قوپموش بوز کولک‌لز
اولاشیر چیلپاق باغ‌لاردا
اوره‌گیمدن کئچن یاشیل آیاقلی باهار –
هاردان ،هارالاردان جانیما یول آچمیش
گؤره سن؟
بیر- بیرینه قاریشیب
کولک‌لر، للک لر، قاریلتی لار….
باغلارین قولاغینا دولوب
خزان سسی، قارغا سسی، کولک سسی….
یاز نغمه‌لی بو سس‌لر، بو قاناد سس‌لری….
هاردان، هارالاردان گلیر
گوره‌سن؟
سحردن بری
باشقا فصیل ایچینده‌یم:
کؤنلومده،توراغای‌لار اوخوشور
جانیمدا قوشلار اوچوشور
اوره‌گیمده باهار دیرچه‌لیر
خیالیمدا سن گولورسن
ایچیمده کی آخار باخاری
بوروموش الوانلیق،
آیدین لیق…
تهران۱۳۷۰
