سیرلی سوراقلی یوللاردا
حسن ایلدیریم
گونلریمین بویو , گون دوغاندان آی دوغانا
کؤنلومده بولاق ایچیملی ایستک‌لر
گؤزلریمده سئرچه اوچوملو دیلک‌لر
آی سوراقلی گونش‌له
قارا گونئی‌دن آغ گونئیه باخا – باخا
گونلری گوندوزلردیم.
گئجه لریمین بویو , آی دوغاندن گون دوغانا
آی شافاغیندا گوموش‌لنیب
گونش شافاغیندا قیزیل‌لانان
گونش سوراقلی آی لا
گئجه‌لری گئجه لردیم.
اویاناردیم
سحر سولاریندا اولدوزلار آخارکن
آلما دادلی ، ناغیل بیچیملی گئجه‌لریمدن
هئیوا قوخولو، قوش اوچوملو گوندوزلریمدن
یول‌لار کئچردی
سیرلی – سوراقلی یول‌لار.
گؤزلریمدن باشلانیب
اوزاق‌لاردا هاچالانان بوداقلی یول‌لار.
هاراسا
سسله‌ییردی منی
اووسونلو سئودالار
سیرلی صدالار!
سیرلی – سوراقلی یول‌لارا چیخدیم
قانلی – قادالی گونلری
سیزیلتیلی گئجه‌لری
گئییندیم
سویوندوم
آرزولاریم ، ایستکلریم سؤز قینیندا
اوره‌ییم کؤز قونداغیندا
ییخلمیشام دورموشام
دورموشام ییخلمیشام
یورغونام ، یورغون
آلاگؤزلو سحرلرین
شفق‌لی سولاریندا یویونوب ،
سحر یئل‌لرینده قورونوب ،
شفق واختی دان یئرینه سریلمک ایسته‌ییرم
شفقه بورونوب اؤلمک ایسته‌ییرم!
۱۳۷۶ تهران
یک پاسخ
یاشاسین ایلدیریم موعللیمی،چوخ گؤزل و دویغولو و اوره یی سیرلی- سئحیرلی دونیالارا آپاران بیر شعر اوخودوم. آرزیم بودور کؤورک دیلک لرینیز گونش کیمی شافاق ساچسین…