باخ بیزیم داغلارین قیز بنیزینه،
لاله یارپاغیندان لئچگی واردی.
نرگیزلر بوی وئریر آدام دیزینه،
تر بنؤوشه دولو اته‌گی واردی.
او اوجا داغلارین باشیندا قارام،
پوزولماز ایلقارام، سینماز ویقارام؛
ایللردی محبت ایشینده وارام،
بو ایشده الیمین امه‌گی واردی.
یاخشی ایش یاخشیدی کیم نه دئییب کی؟!
یامان وار یاخشی‌نین دونون گئییب کی!
«دوز اگرینی کسر» آمما حئییف کی،
بعضا اگری ایشین چؤره‌گی واردی.
اگری چؤره‌ک سالسا یاییلمیر اته،
قوربانام دوزلوکده او برکته.
آتالار سؤزونو سالما قوربته،
بو سؤزده باللارین پته‌گی واردی.
اوره‌گین هنیری، اودو محبت،
بوتون یاخشی‌لارین آدی محبت،
حیاتین مزه‌سی، دادی محبت،
بونو بیلمه‌یه‌نین کؤته‌گی واردی.
بیر مثل وار: اجل گلر جان گئدر،
«ائلیار»ین عؤمرونو ائیله‌مه هدر!
قییما برکه سالسین اونو غم- کدر!
چونکو بیر یوموشاق اوره‌گی واردی.
ماکو- ۲۵/۳/۱۴۰۵
