گؤزه‌ل وطنیمین دؤرد بیر یانیندا
یئلک یئلگه‌دیر اوزوم باغلاری.
دئییرم اوزوم‌له وئریب ال اله-
بیر دولو دویونجا گزیم باغلاری.

چالیشان اللرین قاباری واردی،
قابار، اللر اوچون بیر افتخاردی،
یاشیل کئچمیشیمدن بیر یادگاردی-
بئجریب امک‌له دوزوم باغلاری.

یاشیللیق حسسینده غرق اولور یاشام،
اورکده اویانیر شکوه، احتشام؛
ائللر یاخشی بیلیر هر سحر آخشام-
گونش سلاملاییر بیزیم باغلاری.

وطن، گورکمیندن افتخار آلار،
طبیعت حوسنوندن یوز باهار آلار؛
زامان آجی کئچر دنیا قارالار-
بیر لحظه گؤرمه‌سه گؤزوم باغلاری.

گؤزه‌ل شه‌هریمی قوجاقلایاردی،
قوناغا، قریبه حؤرمت قویاردی،
اورمو دنیزینه سو ساخلایاردی-
بیزیم نجابتلی اوزوم باغلاری….