عؤمرومون پاییزلی لحظه‌لرینده
یئنه باهار عطری ساچیرسان آ یئل!
اوستومه باغلاییب توم قاپی‌لاری
اوره‌ک پنجره‌می آچیرسان آ یئل!
سوزورسن رؤیالی بیر گؤزل کیمی
اوره‌یی اوخشورسان بیر غزل کیمی
آرا بیر سارالمیش بیر خزل کیمی
منی گؤتوروبن قاچیرسان آ یئل!
بیر دایان دردیمی سویله‌ییم سنه
گونلردن بیر گیلئی ائیله‌ییم سنه
دایانان دگیلسن! نئیله‌ییم سنه
یئنه عؤمور کیمی اوچورسان آ یئل!
دایان سئوگی‌لرین قیتلیق ایلینده
دایانسین هیجرانین بمی زیلینده
بیر قلبین، بیر عشقین مقابیلینده
آیاق ساخلاماغا ناچارسان آ یئل!
ارومیه – ۲۲/۸/۱۴۰۲
