رؤیالی باغلاری آلما چتیرلی،
بیللور بولاقلاری یارپیز عطیرلی،
گوندوزو رؤیالی، گئجهسی سیرلی،
جویزی، بادامی دادمالی کندیم!
آلماسی شکرلی، آلچاسی باللی،
قوهونو کرتمکلی، قارپیزی خاللی،
چؤلو بیلدیرچینلی، داغی ماراللی،
بوستانی قیرالی توتمالی کندیم!
داغلاری بولوتون اوزونو اؤپن،
بولوتو عطیرلی یاغیشلار سپن،
یاغیشی یاغاندا گلیب گؤرهسن
سئلی سئل اوجونا چاتمالی کندیم!
اوجامان گؤیلری دورنا قاطارلی،
قاطار بولوتلاری میرواری بارلی،
بارلی باغچالاری یارپاق حاصارلی،
حاصاری گؤیلره چاتمالی کندیم!
لعل و جواهردی تورپاغی، داشی،
گؤزهلرین سویو، گؤزلرین یاشی،
گؤزهللر ییغناغی بولاغین باشی،
سونالی، سارالی، فاطمالی کندیم!
آرپان آدام بویو، بوغدان بیچیملی،
چؤرهگین یئمهلی، سویون ایچیملی،
یادینا سالیرسان باری هئچ منی
آی ایستی قوجاغی یاتمالی کندیم؟!