گلمیشم ایچیمی من چکه- چکه
آه، باشی دومانلی وطن داغلاری!
بولوت‌لار سو سپه یاهالدا بلکه
سینه‌مده کؤزه‌رن توتن داغلاری.
جان درمانی واردی چیچک‌لرینده،
آرا آری‌لارین پتک‌لرینده؛
اوجا زیروه‌لرین اتک‌لرینده
آیاق آلیب گئدیر قاز‌آیاق‌لاری.
کؤوره‌ک بیر باهارین گؤزللیک‌لری
خیالا جومدوروب یاشیل دیک‌لری،
باخیرام گؤرمورم چیل کهلیک‌لری
دره‌نی بورومور اوخوماق‌لاری.
بابنک یوخودان تزه اویانیب،
قرنفیل بزه‌نیب، لاله دارانیب،
بنفشه بوینونو بوکوب، دایانیب
شئح دامجیلاریندان بویون باغلاری.
گوزلرده باخیشین قیتلیغی واردی،
چایلاردا آخیشین قیتلیغی واردی،
بو یازدا یاغیشین قیتلیغی واردی،
اوخوماز اولوبلار داغ بولاق‌لاری.
بو ایل اوره‌گیمی برک ائیله‌میشم،
دوستلاردان کوسموشم، ارک ائیله‌میشم،
بو اوزدن اونلاری ترک ائیله‌میشم،
گیلئی ائیله‌مگه یوخدو حاق‌لاری.
اورمو- حیدرلی داغلاری . ۳/۲/۱۴۰۴
کوزرمک: شعله‌سیز یانماق
توتمک: توستو ائله‌مک
قاز آیاغی: داغ پئنجری
ایچ چکمک: قهرلنمک (بغض)
