دوز دالانا باخیردی اوچقون داخمالاری،
پاییز گونلری‌نین بیرینده
دالانین قارانلیق سوواشمیش باشلانغیجیندا
ایسلاق ساچلاریلا قارشیما چیخدی.
اؤپوجوک گؤرمه‌میش گوناهسیز دوداقلارین چاتیندا
و آلوو باغی گؤزلرینده
ایللرین، آیلارین
تانیق‌سیز آغریلاری یووالانمیشدی.
ـ گئجه‌نی هئچ یاتمامیشام
گؤزومون یاشینی {اووجونون ایچینی گؤرسه‌دره‌ک}
بئله – بئله تؤکموشم.
آغلادی
آغلادی
آغلادیق…
اؤلگون کوچه دؤنگه‌سینده
پاییز وورموش بیر آغاج‌سا
یئتیم یارپاقلارینی
کولک‌لره باغیشلاییردی.