چوخدان‌دیر اؤزومه باش چکمه‌میشم
بیر گؤره‌م، سوروشام حالیم نئجه‌سن؟!
ایل‌لردیر گؤزومه گؤروکمه‌میشم
دوشمه‌ییب اؤزومه یولوم، نئجه‌سن؟!
بیر گئده‌م کؤنلوم‌ده دینجیمی آلام
ساچیمی اوخشایام، یانیمدا قالام
اؤزومه سؤیله‌یم: هارداسان بالام؟
گولوم‌دن سوروشام: گولوم نئجه‌سن؟!
من شهر آلمادیم، قالا توتمادیم
توتمادیم اؤزومو، له‌له توتمادیم
بو دوستاق دیلیمی دیله توتمادیم
یانیندا گؤده‌ک‌دیر دیلیم، نئجه‌سن؟!
کؤنلومون غربت‌ده آدامی قالدی
منه اونوتدوردو آدیمی، قالدی
منیم چکمه‌دیییم قادامی قالدی؟
آی گؤزون قاداسین آلیم، نئجه‌سن؟!
جیبیم‌ده آدرئس یوخ، الیم‌ده چارا
کیمی آراییرام؟! آرا ها آرا!
دئ هله سن هارا، بورالار هارا !
بیزه ده خوش گلدین، اؤلوم، نئجه‌سن؟!..
