اوشاقلیغیم فلاکت ایچینده کئچدی آرخاداش!
اولمایان سوفره‌دن
اولمایان یئمک‌لر یئدیک
سامان چؤپونو بارماغیمیز آراسینا آلیب
سیقارا چکه‌رک
اولمایان موتلولوق‌لار یاشادیق
کؤر-کؤهنه‌لری گئییب
بایراما ساخلادیق تزه پالتارلاریمیزی
یاراسینی سارماق ایسته‌دیم بو آجی‌لاریمین، آما
اولمادی آرخاداش، اولمادی!
من،
حیاتی اوخوماق ایسته‌دیم
پیشیک‌لرین گؤزلریندن
شعرین محک داشی اولماق
گؤز یاشی اولماق ایسته‌دیم
بیسیکلئت ایله جننته گئتمک
جهننمه گئتمک ایسته‌دیم
آلیب ترکیمه بو یئر کوره‌سینی
اولا بیلردی ایسته‌سه‌یدین، -دئییرسن، آما
اولمادی آرخاداش، اولمادی!
بیر وطن کشف ائتدیم روحومدا
اوجسوز بوجاقسیز بیر غربت
قاپانیب یاشایا بیلَردیم ایچیمه
و قاپایا بیلردیم هر شئیه گؤزلریمی
سنه شول‌وزوممه اولوم اولدو دئسه‌م
اولمادی آرخاداش، اولمادی!
کیچیک بیر ائویم اولسون ایستردیم دونیادا
بیر آرابام، بیر قادینیم
آما اوشاق گتیرمک ایسته‌مزدیم دونیایا
اوشاق تربیه ائتمک اوچون
یاخشی بیر یئر دئییلدیر دونیا!..
آز آشیم،
آغریماز باشیم!
بونو کیم ایسته‌مز آرخاداش؟!
کیم ایسته‌مز؟!
آما من،
بؤیله حاضیر و آبسورد دونیانی ایسته‌مه‌دیم
ایسته‌سه‌یدیم
اؤلومو ایستردیم
اوزو-سولو و آلنی-آچیق او اؤلومو!
من،
ائوی، ائو اولسون
قادینی، قادین اولسون ایسته‌مه‌دیم
من الی چنه‌سینده دینله‌دیم
اوزوم آغاجلاری‌نین
سالخیم-سالخیم ساللانان
گؤیسل وَحْیْ‌لرینی
آغاج پیغمبرلرین
نامازلی سوکوتونو
من عشقی عشق اولسون ایسته‌دیم آرخاداش
من گؤیو گؤی کیمی ایسته‌دیم، بیلیرمی‌سن؟!
روح‌لارا چیچک اکمک ایستردیم، اولمادی!
کولک‌لره سینه گرمک ایستردیم، اولمادی!
یاغمورلارا اوز دؤشه‌مک،
یارپاقلارلا ال وئرمک ایستردیم، اولمادی!
ان سونو
باخ اوخودوغون بو شعری بئله
یازماماق ایسته‌دیم، اولمادی!
دیلیمه پای چیخسین یالان دئسه‌م اگر
ساقین یالان سانما بونلاری
بونلارین تامامی اولدو آرخاداش!
اولدو!…
