گؤره‌سن کیمدی بو دَلی؟!
بیز کئچدیک بیزی سؤیمه‌دی،
او تانرینی قارالادی
ایت-پیشیک پایی قویمادی،
سؤیدو،
یئری-گؤیو سؤیدو دؤیدو،
کؤلگه‌سینی دؤیدو
هامی‌نین آغزینی اَیدی
زوربایا، زورا اَیمه‌دی،
گئتمز، او اوزدن گئتمه‌دی
بیلمه‌دیک دعواسی نه‌دی
بیرآز دا چالدی، اوینادی
آرتیق هئچ کسی سایمادی،
عاغیل آختارا-آختارا
گؤر بیر گلیب چیخیب هارا؟!
بو دونیایا، پولا، وارا اویماز
هئچ نه‌یه اویمادی،
هم بورالی، هم اورالی
گؤره‌سن کیمدی بو دَلی؟!
هامی یولون چاشدی
ولی او اؤز یولونو جایمادی!..‎