گؤر بیر کیمی سئودیم من آرخاداش!
اوزومه اوزومه دوردو
گؤزلری اصلا ائشیتمز
و قولاق‌لاری کوردو!..

دوردوم گئجه بویو یوخلوغونون قاپی‌سیندا
اوچدوم سؤزجوک‌لرین قانادلاریندا
اؤزگه- اؤزگه دوشونوب
آغلادیم اؤز یئریمه
هئچ بیر کیمسه بیلمه‌دی
گولوش‌لریم قانادی
من بیر سئودا یولچوسویدوم
اویور-گز‌رلر کیمی
سطیر- سطیر گزردیم
یاغمورلار اؤلکه‌سینی
یولوما ایشیق توتاردی اونون گؤزلری
گؤزلویونو ساخلاماق اوچون
یاخشیجا تاسارلانمیشدی
قولاق‌لاری و بورنو!..

حسرت‌دیر، کدردیر، آجی‌دیر، غم‌دیر
عشقین پرده آرخاسی جهننم‌دیر
دورمادان قارالار قان‌لار
اؤزونو دئو آیناسیندا گؤره‌ن‌ بونو نه آنلار؟!
گؤی اوزونو دیله-دیشه سالدیلار گولوم!
اؤلو گؤز آدام‌لار
آکتور آدام‌لار
بیر ده، آدی پیسه چیخمیش بیر اؤلوم!..

گؤر بیر کیمی سئودیم من آرخاداش!
اوزومه اوزومه ووردو
گؤزلری اصلا ائشیتمز
و قولاق‌لاری کوردو!…