بارماقلارینی تئللریمه شانه‌یه دؤندر!
قایتار او قدیم چاغلارا دیوانه‌یه دؤندر!
دؤندرمه جان اوسته اوزومو قبله‌یه ساری
تاپ سمتینی اول سئوگیلی جانانه‌یه دؤندر!
گؤندر آرازا، خان آرازیم قوسلومو وئرسین
دولدور قدحی حسرتی پیمانه‌یه دؤندر!
مئیخواره‌لرین آلماق اوچون خئیر- دوعاسین
تابوتومو سون کز در میخانه‌یه دؤندر!
بوک دوزلارا دفن ائیله منی اورمو گؤلونده
ویرانه آرا، قبریمی ویرانه‌یه دؤندر!
نه فاتحه، نه یاسین اوخو قبریمین اوسته
چال «جنگی‌کوراوغلو» منی افسانه‌یه دؤندر!
وارلیقدا «هریزلی» ده‌یرین وئرمه، نه فایدا؟
یوخلوقدا اونو شاعر دوردانه‌یه دؤندر!
۱۴۰۴/۰۷/۲۰