دونن چوخ دوشوندوم سنی
الین بوم-بوش‌دو ایلاهی!
بو گون من سنه آغلادیم
یئرین گلمیشدی ایلاهی!
منم بیر یییه‌سیز شاعر
اورهییمده چمن، چاییر
نییه بَه سسین چیخماییر
دئ بو نه ایش‌دی ایلاهی؟!
باشیما داش قارلامیشدی
باخدیم گؤزلریم قاماشدی
اورهییمده قاردی، قیش‌دی
بو نه قارغیش‌دی ایلاهی؟!
منی منه گولدورورسن
دیریلدیرسن، اؤلدورورسن
سن همن تانری دئییلسن
نییه ده‌ییشدین ایلاهی؟!
او قده‌ر اؤلمه‌دیم ده من
ائلچی گلدی قبیریم‌دن
باخ بو اورزون صبیریندن
صبیریم داشدی ایلاهی!
داها نه‌لر گؤردوم، نه‌لر!
نه کرم‌لر، نه له‌له‌لر
یوللادیغین توم بلا‌لار
منه اولاشدی ایلاهی!
قیزینماغا بیر اود دا یوخ
سؤیکنمه‌یه پالید دا یوخ
گؤی‌ده بیر تک بولود دا یوخ
بو نه یاغیش‌دی ایلاهی؟!
او آتدیغین داش من ایدیم
گلن داشا توش من ایدیم
من نه‌تهر دوشمن ایدیم
بو نه ساواش‌دی ایلاهی؟!..
