دجللیییمدن آدیمی تولکو سسله‌یردیلر اوشاقلار،
اوشاقلیغیمدا بیر قارا توپوم وار ایدی
بوتون نیفرت پنجره‌لرینی توشلایاردیم.
یوخ، ایندی نیفرت پنجره‌سیندن باخا بیلمه‌رم بو یاشیمدا.
بو یاشیمدا چاخناشیر اورهییمین هر طرفی
تجربه‌لریمی آلوولاندیران سئوگیدیرسه بیر طرفینده،
بیر طرفینده سکوت ایچینده‌دیر نیفرت
قالاقلاندیریر زامانین کؤلگه‌سینده تونقالینی.
سنین گئدیشیندن سونرا اؤیرندیم
گوجلنمک، سسسیزلیکدن عبارتدیر.
بایپولار اولدوغومو دئدییینده پسیخولوقوم
سیندین،
اوشاقلیقدا قارا توپوم ایله سیندیردیغیم پنجره‌لرین شوشه‌سی کیمی.
سونرا ماشیندا دانیشمادین، سوسدون،
همین سوسقونلوقدان باشلادی آرامیزداکی ساواش،
من اوجادان گولنده سن دئییردین: “سوس… یاواش…”
ماشیندا آیاغیمین آلتیندا بیر قارا توپ وار ایدی – قیزین هانانین ایدی.
بیر یورغانیمیز دا وار ایدی آرخا اوتوراجاقدا
هردن قونشولارین گؤرمه‌سین دئیه آراسیندا گیزلهنردیم ائوه قده‌ر،
او دا بیزیم دئییل ایدی، آنانین ایدی.
بیر قارا توپوموز وار ایدی اولوب-قالان،
بیر شوشه‌سی سینمیش پنجره،
بیر هر سؤزومده دئدییین: “سوس… یاواش…”
بیر ده سنی سئودیییمدن
مئلانخولیک دویغولاریمدا شوبهه‌لریمدن یارانان ساواش.
بو ساواشدا یئنیدن دوغوردومسا هر شئیی،
هر شئیی بیر گئجه‌ده گؤمدون خاطیره‌لرده.
نه قده‌ر نحس ایمیش آیاقلاریم؛
مندن سونرا حَیَطینده چیچکلر آچدی،
مندن سونرا گونش سئودییین کیمی ساچدی،
مندن سونرا کیتی ده دوغدو آلا-بولا بالالارینی،
مندن سونرا، نه بیلیم او سئوگیلیسی ساری پیشیک هاراسا قاچدی.
سنی اؤپدویوم یاتاغین آلتیندامی اَمیزدیریر بالالارینی؟
پیشیکلرین یاتاق آلتیندا حیاتلارینین داواملیلیغینا باخما
اوستوندهسه سن داوام ائتدیریرسن حیاتی تک باشینا.
ساواشینا گیریبسن، منه نیفرت ائتمه‌یین ساواشینا.
آیاقدامی اؤپوشوردوک؟
یوخسا آیاقدا قالماق اوچون دؤیوشوردوک؟
بو ساواشدا سنی، سنین سئودییین اَللریم ایله یارالادیم،
بو ساواشدا اؤزوم بیلمه‌دن اورهییمی پارچالادیم.
تضادلار دونیاسیندا سیمفونییا ایدیسه سئوگیمیز،
قلب کریزی کئچیردی اورکئسترین رهبری آیریلیقدان.
آیریلیقدان باشلادی هئچ زامان الیمیزه چاتمایان دویغولار،
آیریلیقدان باشلادی بوتون نیفرتلرینین قارشیلیغیندا سنی سئومه‌ییم،
و من، سندن سونرا پوللاریمی پسیخی درمانلارا اینوئستیسییا ائتدیم.
سن ایسه منیم دردلریمله اؤزونو محو ائتدین.
ییخما، بوتون گوناهلاری منیم بوینوما!
بو سیمفونییانی دینله‌مه‌دن واز کئچدیک هر شئیدن
و گئجه‌لرین سکوتوندان قورخماغیمیزا حاق وئریرم ایندی.
ایندی… آخ… یادیمدان چیخمامیش دئییم کی،
دونن گئجه دوُزوم دا بیتیب-توکندی مطبخیمده
ایندی خاطیره‌لریمیزی سپیرم یارالاریمین اوزه‌رینه…
سنین گئدیشیندن سونرا نه قده‌ر قار اولوب یاغدیم؟!
نه قده‌ر اؤزوم-اؤزومه بولود اولدوم، اؤزومو ساغدیم؟!
نه قده‌ر گؤی اولوب گورولدادیم؟!
نه قده‌ر اؤزومو سن قاییداجاقسان دئیه توولادیم؟!
سنین گئدیشیندن سونرا
دوردوردوم عقربه‌سینی ساعاتلارین
هر ثانیه ایچیمده یاندی،
هر ثانیه، ایچیم ده یاندی،
هر ثانیهنین ایچینده یاندیم.
اووووی… کرم…
ایکیمیزی ده جنّتین اورتاسیندا یاندیردیلار،
یاندیغیمیز یئردن قارا چیچک بئجره‌جک، تلسمه…
سنین گئدیشیندن سونرا اؤیرندیم،
گوجلنمک سسسیزلیکدن عبارتدیر!
اوف… سوسا بیلمیرم سئوگیلیم،
یعنی گوجلنه بیلمیرم ای روحونا ایشگنجه وئردیییم قادین.
ایچیمده‌کی بو آلووو
سونسوزلوق دنیزینین دالغالاری دا سؤندوره بیلمز، بیلیرم…
گوجسوزلوک، ایچیمده‌کی آلوولارلا ساواشان دنیزین آبرازییاسیدیر
بیر آزدان اینتیحار ائده‌جه‌یم، داریخما!
عزایا باکیدان دا گلهجکمی دوستلاریم؟
چونکی صاباح ایچیمده‌کی خاطیره‌لرین یاسیدیر…
سونونجو نفسیمدن سونرا
سیناجاق شوشه‌لر،
دایاناجاق عقربه‌لر
و ساغ گؤزومدن بیر قارا توپ دیییرلهنهجک اورتالیغا…
