منه درد مکتبینده
آیریلیق اؤیرتدیلر.
سئوگی الیفباسییلا
قلبیمه ظولم ائتدیلر.

«آ»-دان باشلامادیم من،
آغلاماقدان باشلادیم.
من بو مکتب یولوندا
شوشه‌نیزی داشلادیم.

«ب» همن «بیز»-ـه دؤندو،
بیز کدرین سونویدوق.
بیز بَی‌لرین آلماسی،
گلینلرین دونویدوق.

آلما کیمی آتیلدیق،
بیزی توتان جاناوار
پارام-پارچا ائله‌دی.
بعضاً ده بیز ساتیلدیق؛
دئمک دونیا بئله‌دی؟!

دونا دؤندوک، مین دونا،
گلینین دونو یاندی.
دون‌لا بیز یانا-یانا،
درد یوخودان اویاندی.

«ظ» همن ظولوم ایدی،
بیز اوشاق، نه بیلیردیک؟
صینیفده معللیمین،
ساققالینا گولوردوک.
دئمک عؤمور کئچیردی،
قوجالیردیق، اؤلوردوک.

اؤلوم دئمه عزیزیم،
اونسوز دا‌ اؤلو ایدیک.
بیز خار ایله ساواشان –
باغلارین گولو ایدیک.

دردیمیز سئوگی اولدو،
سونرا دوشدو آیریلیق.
یانیب-یانیب آلیشدیق،
قلبی دئشدی آیریلیق.

«آیریلیق، آیریلیق، آمان آیریلیق،
هر بیر درددن اولان یامان، آیریلیق.»