قارانلیغا قاپیلدیم اومودسوز خیاللاریملا
اورهییم سیخیلدی حبسخانانین دیوارلاری کیمی،
دئپرئمدن تؤره‌نن سسیم تیتره‌دی
و دونیا گئتدیکجه اوزانان یوللارا چئوریلدی.
گؤیون سونسوزلوغوندا ایزلهدیییم اولدوزلار
باشیمین اوستوندن اوزاقلاشدیلار سایریشاراق.
یئنیدن بیرلشمه‌لری اوچون دارتینان سینیق آینانین پارچالاری کیمی
اولدوزلارین بیر داها بیرلشمهیهجهیینی آنلادیم.
گؤی اوزونو آی، یئر اوستونو شهرده‌کی ایشیق دیرکلری ایشیقلاندیرسا دا
قارانلیغی آختاریرام!
کوچه‌لرین بوجاغیندا آغزی کؤپوکلهنن قارداشین یانیندا،
باجینین حَیَطده شریتدن ساللادیغی سوتیَنینه باخان
قونشولارین پاریلتیلی گؤزلرینده آختاریرام قارانلیغی!
آنانین محکمه‌ده دوداغینین اوستونده
گؤللـهنن بورون سویونا قاریشمیش گؤز یاشلاریندا
و آتانین… آتانین قابار اللرینده‌کی گؤم-گؤی پوللاردا آختاریرام…
یئر کوره‌سینی «مثبت فیکیرلهشک!» آدلی کیتابلار قورتارسا دا
بو سینیق آینانین جینسینده‌کی عاییله‌نی بیرلشدیره بیلمه‌یه‌جک.
ایتسم ده قاریشیق نظامین ایچینده!..
اسارتین زنجیرینی قیرماغا چالیشماغیمی
سرحد کناریندا اوچان قوشلارین قانادلاریندان اؤیرندیم!
یئنه ده اومودومون آلوولاری کؤزَریر ایچیمده
آدیمی چیغیرا-چیغیرا سسله‌ین او قیزین سسینی خاطیرلاییرام.
پسیخولوژییا حکیمی آلزایمئر توتاجاغیمی دئسه ده
او قیزین صفتینی خاطیرلاماغا چالیشرام.
هه… دوشدو یادیما دوواغی داغیلمیش کؤپهیین قیزی!
قارانلیغی دولدورون ایچیمه، بو قیزی تانیمیرام بلکه ده!
آغارمامیشدی ساچلاری، منی چیغیرا-چیغیرا سسله‌ین قیزین
هئچ زامان دا اینانا بیلمزدیم آغاراجاغینا.
اوزونه چوپور، آلنینا شعیر قازمامیشدی تجربه‌لر
یاشیل یایلیغینی یئللـهدَردی او اولسایدی.
سیلین بو صحنه‌نی، بئینیمدن سیلین!..
اومود آدلی بیر ایشیغین بؤیوکلویو
کیچیک، آمما گوجلو قارانلیغا مغلوبدور!..
اِی منه آزادلیغی اؤیره‌دن سرحد کنارینداکی قوشلار!
سیزین کیمی قانادلاندیراجاغام
باجیلارین دوماندا یولونو آزان ایستکلرینی،
قارداشلارین اورهییندهکی استثمار دیلکلرینی
و یایلیقلارینی یئللـه‌دن قوجالمیش قیزلارین دویغولارینی!..
