ایندی من، گؤیده چتیری آچیلمایان پاراشوتچویم.
گؤیدن گؤی گؤزلرینه دوشورم ایندی من
گؤزلرینه تاپشیر منی، بوغماسینلار
اوزمک باجارمیرام.
سنین گؤزلرین دنیز،
منیم دردلریم دنیز.
سنین گؤزلرین پینار،
منیم اوره‌ییم یانار.
ایندی من سنین دنیز گؤزلرینده بیر کاپیتانام
نهنگ‌لر محاصره ائدیبلر اطرافیمی.
دلینیر، دئشیلیر دردلریمین ایچینده اولان گؤزلرین کیمی،
سو ایله دولور گمیم
منه بیر ال آت بو گمینی لیمانا چاتدیراق
ای تانری‌نین دلّالی، ای منیم نوح عمیم!..
من سنینله ایکی بارداق لیلا شرابی ایچمک ایسته‌ییردیم کوبا باردا
بارلار کوچه‌سینه بومبا قویوب پارتلاتدی داعش‌لر.
پورسوق چاییندا فوتو چکدیرمک ایسته‌ییردیم سنینله
سئل گلیب آپاردی صمد آدلی دویغولاریمی.
– ائهئی، موسی بَی!..
چلییینی امانت وئررسن‌می؟
– چلیییم سینا داغیندا تانری‌نین گودازینا گئتدی علی بی، باغیشلا!..
سازووادا(۱) اولدوزلارین اوچوشونو سئیر ائتمک ایسته‌ییردیم سنینله
گؤیلره دیوار چکدیلر سیاست آداملاری
اولدوزلارین ساچی گؤرونور، نامحرم‌دیرلر دئیه.
ایندی اسکی‌شهرین تراموایلاری ایچیمدن کئچیر،
ایچیندن کئچیرم تراموایلارین ایندی من.
منیم ایچیمدن کئچیرسن تراموایدا سن
سنه آلدیغیم کیتابی اوخویارکن.
من بوغولمادیم دمیز گؤزلوم،
منی تئرور ائده بیلمه‌دیلر کمونیست باخیشلیم،
دیوارلاری اوستومه اؤرته بیلمه‌دیلر افندیم،
من یئنه ده اؤلمه‌دیم،
یئنه ده وارام،
سنین دنیز گؤزلرینه شعر یازیرام تبریزدن.
سنین گؤزلرین دنیز،
منیم دردلریم دنیز.
سنین گؤزلرین پینار،
منیم اوره‌ییم یانار.
(۱) اسکی‌شهرده دیسنئی‌لند موزه‌سیدیر.
