کئچمیشیمی سوروشون،
کیملیییمی سوروشمایین!..
قیلینجیمی یالان صحیفه‌لرینده ایتیلتمیشم تاریخین
آتالارینیزین اؤیود یازدیغی صحیفه‌لرین اؤته‌سینده!
اوزومده‌کی قارا ماسکانی گؤرورسونوزمو؟
تاریخ کیتابینین اؤن‌سؤزونده آنالارینیز توخویوب،
آنالارینیز تاریخین هر صحیفه‌سینده لایلا اوخویوب
شیرین یاتماغینیز اوچون.

آدیمی سوروشمایین!
آدیم طاعون.
آدیم تاریخین ۱۹-نجو صحیفه‌سینده‌کی کووید-۱۹،
آدیم دؤرد یوز مین دفعه ساییلان ۱۹۱۹.
آدیم تاریخین بودونا دامغالانان اینسانلیق،
اوستوندن قان قوخوسو گلیر جاوان
چکیل بیر آز اویانلیق!

تاق-تاق… سالام…
اوغورلوغا گلمیشم، قورخمایین،
اوتورون لطفاً، اوتورون، آیاغیما قالخمایین،
پوللارینیزی سایین
مندن سونرا.
هر شئیینیزی یوخلایین.
سونرا ایسترسه‌نیز قزئت‌لرده یایین
اوغرو اولدوغومو!
آدیم شرقده راکئت،
آدیم غرب‌ده سئوگیلی‌لره گؤندریلن پاکئت.
آدیم سو جینسینده‌کی سرحد مفتیللری،
آدیم او سویون ایچینده بیتن وطن گوللری.
یازین، آدیمی قزئتلره یازین.

تاق-تاق… سالام…
اوغورلوغا گلمیشم، قورخمایین،
قورخوتماق ایسته‌مزدیم، عذرلو سایین.
گلمیشم، باخیشلارینیزی اوغورلایام گؤزلرینیزدن،
دیلینیزی اوغورلایام سؤزلرینیزدن.
بئینینیزی اوغورلایام باشینیزدان،
عؤمرونوزو اوغورلایام یاشینیزدان.
گئجه‌نیزی اوغورلایام اولدوزلارینیزدان،
گوندوزونوزو گونشینیزدن اوغورلاماغا گلمیشم.

کئچمیشیمی سوروشون،
کیملیییمی سوروشمایین!..
آتامین آدی نادان بهلول،
آنامین آدی ماسکا توخویان قودیوا.
اؤز آدیم، کووئنتری شهرینین عیاشلاری،
اؤز آدیم، تبریز شهرینده دیله‌نن قاری.
آدیم، دوننین قزئتینی بو گون ساتان آج اوشاق،
آدیم، دونن قزئتده فوتوسو چیخان یانشاق.
آخ… آخ… آدیم…
آدیمی سوروشمایین،
آدیمین نه اولدوغونا قاریشمایین…