هرگون بوی آتیر قانلی ایپک‌لر بیزیم ائلده!
هئی– هئی بولانیر آرزی دیلک‌لر بیزیم ائلده!
باشلار خیناسیز آغ گونه قالمیشدی تامارزی
ایللردی گزیر بوز بیچنک‌لر بیزیم ائلده!
نیسگیل چیله‌ییر بوردا اوراغ‌لار باهار اوسته
باخ گؤر نه یاییر دردلی بؤلک‌لر بیزیم ائلده!
هر گون آتیریق جان کی چاتاق خوش گونه آمما
آی- آی کؤزه‌ریر جان کپنک‌لر بیزیم ائلده!
چوخداندی بیزیم ائلده کؤنول شاختایا بویلو
چوخداندی کی دوزلاقلی گؤلک‌لر بیزیم ائلده!
آنجاق نه دئییم درد آسیلی قاپ باجامیزدان
گؤز آتمادادیر یانغی سولک‌لر بیزیم ائلده!
بیر گون یئته‌جک خان صاباحیم چوخدا داریخما
آیدینلاشاجاق گوجلو بیلک‌لر بیزیم ائلده!