شنه‌نی بوغازینا دایادیغین کیمسه‌دن
مهربانلیق، امینلیک اومما!
بوغازیندا سئوگی نغمه‌سی بوغولان قیز، اوغلان‌دان
باغیرتی یئرینه ماهنی طلب ائتمه!
وطنینده سورگون اولان کوتله‌لردن
وطنداشلیق گؤزله‌مه!
ایللر بویو آج، سوسوز، درمانسیز قالان،
اون آلتی ایل گئجه‌لری ایشیقسیز یاشایان اوشاقلاردان
گؤی قورشاغینا ماراق گؤره بیلمزسن.
کیلاسلاردا تخته‌سی قان رسیملی اؤیرنجی‌لردن
یاز ترنملی تابلو….!
یوخ…!
بو قارشیت‌لار بیرلیکده یاشایا بیلمزلر.
«الناس اخوه» و «البشر متساوون»…
بونو غزه‌نین هانسی دوواریندان آسیم؟!
اگر دووار قالمیش اولارسا.
غزه‌ده‌کی کؤرپه‌لره مرمی یوخ
سوت، چؤره‌ک، بیرده اویونجاق وئرین!
بومبالاردان قاچان قوجالارا
قوجاق ایستیلیگینده بیر اوجاق یارادین!
خسته‌لرین، یارالی‌لارین نه‌یینه گره‌کدیر توپ – توفنگ
اونلارا درمان گتیرین، کؤمک چاتدیرین، کؤمک!
باخ…!
بیزیم بو تورپاقدا یاشاماغا بهانه‌لریمیز وار؛
تکی چیچک اوزونده سوزولن شئح
سیز محاربه تانری‌لارینی یاشاماغا راضیلشدیرمیر؟!
دایاندیرین بو محاربه‌نی،
بو سوی قیریمینی!
شعری، سئوگینی، چیچگی سئون انسانلار
صلحه سس وئریر
صلحه سس وئریر
تکی صلحه…!
۲۵ آبان ۱۴۰۲
