آهای قهوه‌ای ساچلی گؤزه‌ل!
سن
گؤزل‌لییین یاساق اولدوغونو
و گیزلی دولاندیغینی
بیلمیردینمی هئچ؟!
ایندی سوچلوسان؛
سوچون، تکجه گؤزل‌لیک کی دئییل،
نفسینده باهار قوخوسو
اوره‌یینده قانلی اینتحار وار؛
گؤزلرین وولکان محبسی‌دیر
دوداقلارینداکی‌لار قورتولوش نغمه‌سی،
آخیب دولور جانلارا،
اریدیر سوموک‌لری؛
ساچلارین ایسه سوچلو بایراق،
گؤزل‌لییینده دالغالانیر آزادلیق، یاشاماق.
آهای قهوه‌ای ساچلی گؤزه‌ل!
سن منی هانسی ضیافته چاغیریرسان؟!
{اؤرتولو مجمه‌یی‌لرده گتیریلیر قدداره‌لر،
قارا پرده‌لر آرخاسیندا اوخونور آیه‌لر}
منیم آیاقلاریم آخساق‌دیرسا، اوره‌ییم شوبهه‌لی
آنجاق تانی‌ییرام من سنی.
بیز
بهمنین اییرمی دوققوزوندا گؤروشموشوک
ماهنی ترنملی گله‌جکده!
گل یئنه گؤروشک گونش دوغمادان
قوروموش گؤلوموزون بایاض ساحیلینده!
الیمیزده سوچلو بایراق
گؤزل‌لییینده دالغالانسین آزادلیق، یاشاماق.
4 آبان ۱۴۰۱
